Өзбекстан Республикасы Президентиниң 2024-жыл 16-июльдеги «Белгили қарақалпақ шайыры ҳәм ойшылы Әжинияз Қосыбай улы туўылған күниниң 200 жыллығын кеңнен белгилеў ҳаққында»ғы қарарының орынланыўын тәмийинлеў мақсетинде, усы жылдың 14-ноябрь күни Наўайы ўәлаятының Руўхыйлық ҳәм ағартыўшылық орайында «Әдебият аспанының Зийўары» атамасында әдебий саз-сәўбетли кеше болып өтти.
Онда Бердақ атындағы Қарақалпақ мәмлекетлик университетиниң қарақалпақ әдебияты кафедрасы профессорлары филология илимлериниң докторы Қуўанышбай Оразымбетов ҳәм Бахтияр Генжемуратовлар өз баянатлары менен қатнасты.
Кешеде студент-жаслар тәрепинен Әжинияз Қосыбай улының өмири ҳәм дөретиўшилигин сәўлелендиретуғын сахналық көринислер, халық мүлкине айланып кеткен қосықлар ҳәм миллий аяқ-ойынлар жыйналғанлар нәзерине усынылды.
Илаж даўамында Наўайы ўәлаятындағы мектеплерге университет жәмәәти тәрепинен Әжинияз Қосыбай улының өмири ҳәм дөретиўшилигине байланыслы китаплар саўға етилди.
Адилбай Оразов,
Қарақалпақстан хабар агентлиги шолыўшысы