Бердақ атындағы Қарақалпақ мәмлекетлик университетинде «Өзбекстан Республикасы Конституциясы ҳаққында»ғы Өзбекстан Республикасы Конституциялық нызам жойбарының мазмунын студент-жаслар арасында түсиндириў мақсетинде «Референдум ҳәм жаслар» атамасындағы форум болып өтти.
Форумда Қарақалпақстан Республикасы Жоқарғы Кеңесиниң комитет баслығы Ш.Өтемисов, университет ректоры А.Реймовлар шығып сөйлеп, Конституциямызға киргизилип атырған өзгерис ҳәм қосымшалар, 30-апрель күни өткерилетуғын референдумның мазмуны, жаслардың жоқары оқыў орынларында оқып билим алыўына имканият бериўши статьялар туўралы кең түрде айтып өтти.
Илажда студентлер тәрепинен баянатшыларға жаңа Конституцияның жойбары бойынша сораўлар берилип, оларға тийисли жуўап алды.
Форум шеңберинде Қарақалпақстан эстрада қосықшыларының қатнасыўында гала концерт шөлкемлестирилип, бул форум қатнасыўшыларына көтериңки кейпият бағышлады.
Адилбек Ҳамидуллаев,
Юридика факультети тьюторы.
Қарақалпақстан хабар агентлиги