Республикамыздың барлық аймақларында болғаны сыяқлы, соңғы жыллары халық хожалығының барлық тараўларында ири өзгерис ҳәм жаңаланыўлар жүз бермекте. Өзбекстан Республикасы Президенти ҳәм республика ҳүкиметиниң арнаўлы пәрман ҳәм қарарлары тийкарында, аймақларды социаллық-экономикалық жақтан раўажландырыў, жумыссыз пуқаралардың бәнтлигин тәмийинлеў бойынша Тахтакөпир районында да бир қатар унамлы жумыслар әмелге асырылмақта.
Район орайынан баслап, алыс Белтаў, Қоструба елатларына шекемги аралықтағы аўылларда әмелге асырылған жумыслар нәтийжесинде, бүгин халықтың жасаў жағдайы жақсыланып, турмысы абаданласпақта.
-Жыйынымыз аймағында 166 хожалықта 1068 халық тыныш-татыў жасап келмекте,-дейди Белтаў аўыл пуқаралар жыйыны ҳаял-қызлар белсендиси «Ўатан пидайысы» көкирек белгиси ийеси Жумахан Өтепова.-Өткен бир неше жыл ишинде көшелеримиз оңланып, оларға жақтыландырыў үскенелери орнатылды. Мектеп ҳәм балалар бақшаларына капитал оңлаў жумыслары жүргизилип, онда балаларымыздың заман талабына сай тәлим-тәрбия алыўы ушын барлық қолайлы шараятлар жаратылды. Нан өнимлерин ислеп шығаратуғын кәрхана, моншахана, гөззалық салоны, еки орында суўды душшыландырыўши станциялар иске түсирилип, онда жаңа жумыс орынлары жаратылды. Аўыл балаларының спорт пенен шуғылланыўы ушын жасыл қапламалы футбол майданшасы қурып берилип, онда балаларымыз футбол менен турақлы түрде шуғылланып келмекте.
-Тахтакөпир районлық Халық билимлендириў бөлимине қараслы 15-санлы улыума орта билим бериў мектеби 1990-жылы қурылған болып, оқыў имараты әдеўир тозған еди,-дейди мектеп директоры Мурат Жандәўлетов.-Өткен жылы мектебимизге мәмлекетлик инвестиция бағдарламасы тийкарында 4 млрд 106 млн сумлық капитал оңлаў жумыслары әмелге асырылды. Соның нәтийжесинде, мектепте оқыўшылардың сапалы билим алыўы ушын барлық қолайлы шараятлар жаратылды. 2021-2022-окыў жылында 11-класты 10 оқыўшы питкерген болса, соннан 4 питкериўшимиз жоқары оқыў орынларына кириўге миясар болды.
Сондай-ақ, усы оқыў жылы басында жыйын орайында Тахтакөпир районы спорт мектебиниң футбол секциясы ашылып, онда футболға қызығыўшы тәжирийбели тренер Аймурат Бегжанов басшылығында турақлы түрде шуғылланыўлар алып бармақта.
-Дөгерегимизге 40 тан аслам балалар қамтып алынған,-дейди тренер Аймурат Бегжанов.-Бурын аўылда заманагөй спорт майданшасы болмағанлықтан балалардың футбол менен шуғылланыўына имканияты жоқ еди. Өткен жылы аймаққа жасыл қапламалы стадион қурып берилиўи менен олардың спорт пенен шуғылланыўға имканият жаратылды. Аўыл балаларының футболға қызығыўшылығы жоқары. Сонлықтан олар еки мезгил шынығыўлар алып бармақта. Келешекте усы шәкиртлерим арасынан пүткил елимизге белгили футболшылар өсип жетилисетуғынлығына беккем исенемен.
Ҳақыйқатында да, Тахтакөпир районы аймағында жүргизилип атырған бундай қурылыс жумыслары аймақ халқының абадан турмыс кешириўине тийкар жаратпақта.
Адилбай Оразов,
Қарақалпақстан хабар агентлигиниң шолыўшысы