Президент Шавкат Мирзиёев 7-март күни Ташкент қаласында режелестирилген қурылыс ҳәм көклемзарластырыў жумысларының презентация менен танысты.
Бизге белгили, 2025-жылы Ташкент қаласында Жаслар арасындағы Азия ойынлары өткериледи. Оған континентимизден көплеген спортшы ҳәм тренерлер, ықласбентлер, журналистлер келеди. Бул абырайлы жарысты жоқары дәрежеде өткериў мақсетинде пайтахтымыздың Яшнабад районында Олимпия қалашысының қурылысы режелестирилген. Оның жойбары Англияның «Arup» инженерлик компаниясы тәрепинен ислеп шығылған.
Жойбарға бола, қалашаның орайында олимпия стадионы, оның еки қапталында жабық спорт комплекслери, суў спорты сарайы, шынығыў майданшалары, ескек есиў бассейни қурылады. Барлық шараятлар Азия Олимпия кеңеси ҳәм халықаралық спорт федерацияларының талапларына муўапық болады. Ҳәкимшилик имарат, жатақхана, музей ҳәм хожалық объектлери де қурылады.
Жарыслардан тысқары ўақытта қалаша оқыў-шынығыў базасы болып хызмет етеди. Бул жерде Жоқары спорт шеберлиги институты, спорт федерациялары ҳәм тараўдағы басқа да мәкемелер жумыс алып барады.
Және бир әҳмийетли тәрепи: қалаша жайласатуғын Жаңа Өзбекстан көшеси бойлап тереклер егилип, сейил етиў орынлары шөлкемлестириледи. Ол жер халық ушын ашық болып, сейил етиў, спорт пенен шуғылланыў мүмкин болады.
Мәмлекетимиз басшысы жойбардың баҳасы, спортшы ҳәм тамашагөйлер ушын жаратылатуғын қолайлықларды ҳәр тәреплеме сорады. Жуўапкерлерге жумыслардың көлеми ҳәм зәрүр қаржы муғдарын жылма-жыл есап-санақ етип, анық реже қәлиплестириў, қурылыс бойынша тендер жәриялаў бойынша көрсетпелер берди.
«Жасыл мәкан» улыўмамиллий жойбарын әмелге асырыў бойынша мәжилисте Президентимиз жол шетлеринде гүллейтуғын ҳәм жапырағы реңли тереклер егиў мақсетке муўапық екенин айтқан еди. Презентацияда бул бағдардағы режелер көрип шығылды.
Буның ушын Ташкент қаласының Киши айланба жолы, Ғәрезсизлик, Наўайы, Ислам Кәримов, Афросиёб, Шаҳрисабз, Айбек, Бабур сыяқлы 21 көше таңлап алынған. Оларда каштан, сирень, ясень, лала тереги, шынар, липа сыяқлы саяманлы нәллер егиў режелестирилген. Сондай-ақ, тереклердиң ағашы дурыс ҳәм тамыры беккем болыўы ушын репикаж усылында жетистириў мөлшерленген.
Мәмлекетимиз басшысы саяманлы нәллер менен бирге мәҳәллелерде әнжир, әнар, қурма сыяқлы мийўели тереклер егиў, шертекли көшелер қурыў әҳмийетли екенин атап өтти.
ӨзА