“Ўзагроинспекция”нинг Қорақалпоғистон Республикаси Тўрткўл туман бўлими ташаббуси билан фермер хўжаликлари, бошқа қишлоқ хўжалиги корхона ва ташкилотлар вакиллари иштирокида ғўза агротехник тадбирларининг сифатли амалга оширилиши, жумладан, ғўза қатор орасига ишлов бериш ва ғўзани чеканка қилиш бўйича кўргазмали семинар тадбири ўтказилди.

Семинар кун тартибидаги масалалар юзасидан тажрибали мутахассислар ва деҳқонларнинг тавсиялари тингланиб, фикр алмашинилди. Жорий йил ҳосили учун Тўрткўл туманида 8 минг гектардан ортиқ майдонга чигит қадалган бўлиб, бугунги кунда ғўзалар тобора ривожланиб, шоналаш, гуллаш ва кўсаклаш палласига кирди.

Айтиш жоизки, айни кунларда далаларда культивация, ғўзани озиқлантириш ва суғориш каби агротехник тадбирлар давом этмоқда. Жумладан, тупроқ етилиши билан культиваторни кечиктирмасдан киритилиши ўсимликнинг озиқланиш тизими яхшиланиши, ёш ниҳолларнинг илдиз чириш ва гоммоз касалликлари билан зарарланишнинг олди олинади. Туман бўйича мавсумга 200 дан ортиқ культиватор жалб этилган бўлиб, ғўза қатор орасига мавсум бошидан ўртача 3-5 мартадан ишлов бериш ишлари амалга оширилди.

Ҳозирга келиб, замонавий техникалар билан ғўза қатор ораларига ишлов бериш, чуқур юмшатиш, суспензия сепиш, минерал ўғитлар билан озиқлантириш каби агротехник тадбирларни ўз вақтида сифатли олиб борган фермер ерларида ғўзалар тўлиқ гуллаган. Тадбирда ғўза майдонларида барча агротехник тадбирларни кечиктирмасдан ўтказиш бўйича фермер хўжаликлари ва бошқа қишлоқ хўжалиги корхона ва ташкилот вакилларига тавсия ва кўрсатмалар берилмоқда.

Довуд АБИБУЛЛАЕВ, ЎзА мухбири