“Менинг фикрим” жамоавий мурожаатлар порталида фойдаланувчилардан бирининг “AGRO TV” телеканалини ташкил этиш ҳақидаги мурожаати эълон қилинди.
“Бугунги кунда республикамизда барча соҳаларда бўлгани каби қишлоқ хўжалиги соҳасида ҳам амалга оширилаётган ўзгариш ва ислоҳотлар халқни жуда хурсанд қилмоқда.
Мамлакатимиз аҳолисининг кўпчилик қисми қишлоқ жойларида истиқомат қилганлиги сабабли, аҳолига қишлоқ хўжалик соҳасида самарали меҳнат қилиш ва даромад топишга имконият яратилмоқда.
Хусусан, ҳозирда иссиқхона ташкил этганлик, товуқ, туяқуш, қорамол боққанлик, қалампир етиштирганлик, пахта ва боғдорчилик йўналишларида кўплаб имтиёзли кредитлар берилмоқда, кундан-кунга янгиликлар қилинмоқда.
Бироқ кўпчилик булар ҳақида билишмайди. Шу мақсадда, улар ҳақида аҳолига батафсил маълумотлар берувчи, қишлоқ хўжалиги сир-асрорларини ўргатувчи махсус “АGRO TV” телеканалини ташкил этиш керак, деб ёзади мурожаат эгаси.
Мурожаат муаллифи шу сабабли юқоридагиларни инобатга олган ҳолда “АGRO TV” телеканалини ташкил этишни таклиф қилмоқда.
ЎзА