– Штатни қисқартириш – ходимларнинг сифат жиҳатдан таркибини яхшилаш усулларидан бири. Шу сабабли ишда қолдириш учун имтиёзли ҳуқуқ малакаси ва меҳнат унумдорлиги юқорироқ бўлган ходимларга берилади. Кадрлар бўлими ходимлари Меҳнат кодексининг 103-моддасига амал қилсалар, амалдаги қонунчиликни бузмасдан раҳбарият топшириғини бажаришлари осон бўлади.

Малакаси ва меҳнат унумдорлиги бир хил бўлган тақдирда қуйидагиларга афзаллик берилади. Қарамоғида икки ёки ундан ортиқ киши бўлган ходимларга, оиласида ундан бўлак мустақил иш ҳақи олувчи бўлмаган шахсларга, кўп йиллик иш стажига эга бўлган ходимларга, ишлаб чиқаришдан ажралмаган ҳолда олий ва ўрта махсус, касб-ҳунар ўқув юртларида тегишли мутахассислик бўйича малакасини ошираётган ходимларга ва ишлаб чиқаришдан ажралган ҳолда олий ва ўрта махсус, касб-ҳунар ўқув юртларини тамомлаган шахсларга ўқишни тугатгандан сўнг мутахассислиги бўйича ишлаётган тақдирда икки йил мобайнида қисқартириб бўлмайди.

Шунингдек, мазкур корхонада меҳнатда майиб бўлиб қолган ёки касб касаллигини орттирган, уруш ногиронлари, уруш қатнашчилари ва уларга тенглаштирилган шахсларга, атом объектларидаги фалокатлар оқибатида келиб чиққан нурланиш касаллиги ва бошқа касалликларга йўлиққан ёки шундай касалликларни бошидан кечирган шахсларга ҳам бу имтиёз берилган.

Бу йўналишда рўйхатни узоқ давом эттириш мумкин. Мисол учун, ногиронлиги атом объектларидаги фалокатлар муносабати билан бошланганлиги аниқланган ногиронларга, ана шундай фалокатлар ва ҳалокатлар оқибатларини бартараф этиш ишлари қатнашчиларига, шунингдек, мазкур зоналардан эвакуация қилинган ёки кўчирилган шахсларга ҳамда уларга тенглаштирилган бошқа шахсларга.

Жамоа шартномасида ходимларни ишда қолдиришда афзаллик бериладиган яна бошқа ҳолатлар назарда тутилиши мумкин. Корхонада юқорида санаб ўтилган мезонларга тўғри келадиган ходимлар бўлмаган тақдирдагина бу ҳолатлар инобатга олинади.