«Адолат» социал-демократик партиясидан Ўзбекистон Республикаси Президентлигига номзод Абдуҳалимов Баҳром Абдураҳимович 2021 йил 29 сентябрь куни Нукус шаҳрида жойлашган Қорақалпоғистон Республикаси Савдо-саноат палатасида қорақалпоғистонлик сайловчилар билан учрашди.
“Адолат” СДП Қорақалпоғистон Республикаси кенгаши хабарига кўра, учрашувда партия ходимлари, Қорақалпоғистон Республикаси Жўқорғи Кенгеси депутатлари ва маҳаллий Кенгаш депутатлари, фаоллар ва оммавий ахборот воситалари вакиллари иштирок этишди.
Учрашувни номзоднинг Қорақалпоғистон Республикаси бўйича ишончли вакили – Ўзбекистон Республикаси Фанлар академияси Қорақалпоғистон Республикаси бўлими, Қорақалпоқ гуманитар фанлар илмий-тадқиқот институти директори Альниязов Айтмурат Исмаилович очиб берди ва дастлаб номзоднинг таржимаи ҳоли, меҳнат фаолияти хусусида кенг тушунчалар берди.
Сўнгра сўзга «Адолат» социал-демократик партиясидан Ўзбекистон Республикаси Президентлигига номзод Абдуҳалимов Баҳром Абдураҳимович чиқиб, ўз сайловолди дастурида белгиланган устувор масалалар: қонун устуворлиги, таълим, соғлиқни сақлаш, суд-ҳуқуқ каби соҳаларни янада тараққий эттиришда адолат тамойилларга асосланган кенг кўламли ислоҳотларни амалга ошириш ва олиб борилаётган ислоҳотларнинг самарадорлигини сифат жиҳатдан янги босқичга олиб чиқиш ҳақида маълумот берди.
Тадбирда номзод ва унинг сайловолди дастурини қўллаб-қувватлаб маҳаллий Кенгаш депутатлари, ёшлар ва хотин-қизлар вакиллари, турли соҳа мутахассислари ўз фикр-мулоҳазаларини билдирди. Шунингдек, тадбир иштирокчилари номзод Баҳром Абдуҳалимовдан ўзларининг қизиқтирган саволларига жавоблар олишди.
Куннинг иккинчи ярмида «Адолат» социал-демократик партиясидан Ўзбекистон Республикаси Президентлигига номзод Абдуҳалимов Баҳром Абдураҳимович иштирокида Ўзбекистон Республикаси Фанлар академияси Қорақалпоғистон бўлимида ёш олимлар билан биргаликда давра суҳбати ўтказилди. Давра суҳбати давомида бугунги кунда ёш олимларнинг фаолиятини қўллаб-қувватлаш, лойиҳалари, ғоя ва фикрлари, мавжуд муаммолари юзасидан суҳбат ўтказилди.
