– Ишлаётган ходимнинг пенсияга чиқишида пенсия миқдорини тайинлаш тартиби бугунги кун талабларига жавоб бермайди.
Хусусан, пенсияга чиқаётган фуқаронинг пенсия миқдорини ҳисоблашда охирги ўн йиллик меҳнат фаолияти давомидаги исталган кетма-кет беш йил учун ойлик иш ҳақи олинади. Ўйлаб кўринг шу адолатданми?
Лекин инсон 20 ёш, 30 ёш, 40 ёш бўлганда у бақувват, у соғлом кўпроқ даромад олган, кўпроқ ишлаган. Пенсияга чиқиш олдидан қарийди, кучсизланади, балки у бемор бўлиши мумкин ва ўз-ўзидан камроқ даромад қилган. Лекин унга пенсия тайинлашда айни кам даромад олган йилларни ҳисобга оляпмиз. Албатта бу адолатдан эмас.
Ёшга доир пенсия миқдорини белгилашда фуқаро ишлаган давридаги исталган беш йилни ўзи танлаш имконига эга бўлиши керак. Пенсияни ҳисоб-китоб қилиш учун иш ҳақининг максимал чегараси, яъни пенсияни ҳисоблаш базавий миқдори чегарасини ошириш мавзуси ҳам чуқур таҳлил қиладиган масалалардан бири, – деди ХДП номзоди.
– Бундан ташқари мавжуд тизимларга кўра, аёлларнинг битта боласи учун таътилда ўтирган вақти пенсия даврига қўшилади. Лекин ўзбек оиласи серфарзанд бўлади. Ўзбек оилаларида камида 2-3 нафардан фарзандлар дунёга келади. Қолган фарзандлар тарбияси учун кетган вақт ҳисобга олинмайди. Шундан келиб чиқиб биз аёлларга пенсия тайинлаш учун зарур бўлган иш стажига боласи 3 ёшга тўлгунча уни парваришлаш таътилларида бўлиш вақти тўлиқ қўшиб ҳисобланиши ҳақидаги меъёрни қонунчиликка киритиш кераклигини таклиф этамиз.
Ўлмас Баротов,
Жамшид Норқобилов (сурат), ЎзА