Пойтахтимиздаги Алишер Навоий номидаги Ўзбекистон давлат академик Катта театрида «Milliy» телеканали томонидан таъсис этилган «Ўзбегим аёли – 2021» миллий мукофотини топширишга бағишланган тантанали тадбир бўлиб ўтди.

Унга турли вазирлик ва идоралар, ижодий ва жамоат ташкилотларнинг вакиллари, санъат ва маданият намояндалари таклиф этилди.

Юртимизда умрини эзгуликка бағишлаган, фидойи меҳнати билан Ватан равнақига ҳисса қўшаётган матонат соҳибалари кўп. Уларнинг хизматлари, ҳиммати, фидойилиги, ўз ишига садоқати ва жасорати таҳсинга лойиқ. «Milliy» телеканали ана шундай шижоатли аёлларга эҳтиром кўрсатган ҳолда бир неча йиллардан буён «Ўзбегим аёли» Миллий мукофоти тақдимотини ўтказиб келмоқда.

Бу йили ҳам мазкур мукофотга турли ҳудудлардан 100 нафардан ортиқ номзодлар тавсия этилган бўлиб, уларни саралашда даъвогар аёлларнинг жамиятдаги роли, иш фаолиятидаги жасорати, мураккаб кечган пандемия шароитидаги хизматлари алоҳида эътиборга олинди. Улардан фаолияти энг яхши деб топилганлари «Ўзбегим аёли» Миллий мукофотига муносиб кўрилди.

Жумладан, Азиза Умарова «Smartgov consulting» компаниясининг ижрочи директори, «Ezgu amal» хайрия жамғармаси васийлик кенгаши аъзоси сифатида саратонга чалинган болаларни даволаш амалиётидан қатнашиб келмоқда. Ақида Моҳирова ижтимоий долзарб масалаларни ёритиб келаётган ва хайрия тадбирларида фаол қатнашаётган блогер.

Мукофотга муносиб топилганлардан яна бири Дилдора Рустамова — «Замон» информацион дастури бошловчи ва дубляж актрисаси бўлса, Зулхумор Мўминова кино ва дубляж устасидир. Нисо Турдиева– Самарқанд вилояти болалар кўп тармоқли тиббиёт маркази кардиохирурги. У эҳтиёжманд оилалардаги юрагида нуқсони бўлган болаларни беминнат даволаб келмоқда. Замира Раҳмонова Testo by Zamira Co. ресторани асосчиси. Хайрия ишларида фаол қатнашиши билан бирга Red Jolbors Awards халқаро хайрия танловининг тўрт босқичида муваффақиятли иштирок этиб, ғолиб бўлган.

Жузимгул Бекбергенова Нукус туманидаги «Мажит Жузимгул» фермер хўжалиги раҳбари. У Меҳрибонлик уйи тарбияланувчилари ва кам таъминланган оилаларга амалий кўмак кўрсатиб келмоқда. Ирода Дадажонова Юнус Ражабий номидаги Ўзбек миллий мусиқа санъати институтида илмий ишлар ва инновациялар бўйича проректор бўлиши билан бирга «Мақом» китоб-альбомининг бош ижодкоридир.

Шунингдек, юртимиз тарихидаги биринчи ҳоким аёл, Сирдарё вилоятидаги Боёвут тумани ҳокими Дилфуза Ўролова, Ўзбекистон Марказий банкидаги ягона раҳбар аёл, молиявий саводхонликни ошириш ва банк мутахассисларини қайта тайёрлаш департаменти раҳбари Дилбар Абдуғаниева «Ўзбегим аёли» мукофотига муносиб топилди.

Маълумки, пандемия балосини енгишда тиббиёт соҳаси ходимларининг ҳиссаси катта бўлди. «Тез ёрдам» телелойиҳаси мутахассислари — Инновацион соғлиқни сақлаш Миллий палатаси клиник протоколлари ва стандартларини ишлаб чиқиш бўлими бошлиғи, мутахассиси Клара Ёдгорова, «De-factum laboratories» клиникаси иммунолог шифокори Азиза Хўжаева, Республика ихтисослаштирилган эпидемиология, микробиология, юқумли ва паразитар касалликлар илмий амалий тиббиёт маркази илмий ходими мутахассиси Дилдора Секлер, Соғлиқни сақлаш вазирлиги Вирусология институти илмий ходими, Раъно Қосимова «Ўзбегим аёли- 2021» миллий мукофотига лойиқ топилди.

— Болалар юрагида жарроҳлик амалиётини ўтказиш ғоят мураккаб ва масъулиятли жараён, – деди Ўзбекистондаги ягона кардиожарроҳ аёл шифокор, хориждаги карьерасини ташлаб юртимизга болаларни даволаш учун келган Нисо Турдиева.– Бу жараёнда асосий натижа — жажжи бемор юрагининг қайтадан ишлаб кетишини кўриш олий бахтдир.

Тадбирда мукофотлар ўз эгаларига тантанали тарзда топширилди.

Санъат усталари ва ижрочи ёшлар иштирокида катта концерт дастури намойиш этилди.

                                                                                                                Назокат Усмонова, ЎзА