Электр энергияси ёрдамида юрадиган автомобиллар чиқариш билан фақат америкалик Илон Маск шуғулланаётгани йўқ. Бу истиқболли бозор кўпгина давлатларни, гигант автомобил корхоналарини ҳам қизиқтириб келмоқда. Айни пайт автомобил саноати яхши ривожланган дунёнинг барча мамлакатида автомуҳандислар электромобил яратиш устида бош қотириб, қизғин изланишмоқда.

Куни кеча японлар ушбу жараёндан асло четда қолиш нияти йўқлигини намойиш қилишди. Япониянинг “Sony Vision-S” электромобили Европа йўлларида пайдо бўлди.

Электромобил ҳаракати акс этган видеоролик компаниянинг “YouTube”даги расмий каналида намойиш қилинган.

“Sony Vision-S” 2020 йил охирида Австрия йўлларида синаб кўрилди. Ушбу мамлакат рақами билан рўйхатга олинган автомобил нафақат шаҳар чеккасидаги трассаларда, балки шаҳар кўчаларида ҳам ҳаракатланган.

Биринчи намуна ўзи бошқарилувчи (автопилот) тизим билан таъминланган ва машинага камера, сенсор ва лидар ўрнатилган. Электромобил симсиз тармоқ бўйича 5G тизимига уланган.

“Vision-S” ҳар бири 272 от кучига эга иккита электромотор билан жиҳозланган. Седан соатига 240 километр масофани босиб ўта олади.

Японлар яратган ушбу электрокар илк бор 2020 йилда бўлиб ўтган “CES” кўргазмасида намойиш қилинганди. “Sony” муҳандислари электромобил синови 2020 йил охиигача якунланишини маълум қилишган. Маҳсулот қачон бозорга чиқарилиши ошкор этилмаган.

ЎзА