Ипакчилик ва жун саноатини ривожлантириш қўмитаси раиси Иқболжон Эргашев Ўмон Султонлигидан ташриф буюрган “Albahar Treding” гиламчилик компанияси президенти, инвестор Саид Ал-Равас билан учрашди.
Бугунги кунда мамлакатимизда пиллачилик соҳаси жадал ривожланиб бормоқда. Соҳага алоҳида эътибор қаратилмоқда. 15 дан ортиқ норматив-ҳуқуқий ҳужжатларнинг айнан пиллачилик соҳаси ривожи учун ишлаб чиқилгани бунга мисол.
Хусусан, Президентимизнинг 2023 йил 1 июндаги “Пиллачилик соҳасида касаначиликни қўллаб-қувватлаш ҳамда пилла етиштириш учун озуқа базасини янада кенгайтиришнинг қўшимча чора-тадбирлари тўғрисида”ги фармонига кўра, пиллачилик кластерлари, пиллачилик ва тутчилик йўналишидаги фермер хўжаликлари томонидан янги тутзорлар барпо қилиш учун Ипакчилик ва жун саноатини ривожлантириш қўмитаси томонидан доимий ишлар олиб борилмоқда.
Мазкур, учрашувда икки томонлома ҳамкорлик алоқаларини ўрнатиш, хусусан, ўмонлик инвестор томонидан инвестиция киритилиши ҳисобига ипакдан ва жундан гилам тўқиш саноат корхонасини ташкил этиш масаласи муҳокама қилинди.
Қўмита раиси мазкур жараёнда юртимизда инвесторларга яратиб берилган кенг имкониятлардан фойдаланган ҳолда қўмита ҳамда “Ўзбекипаксаноат” уюшмаси ҳар қандай кўмакка тайёр эканини билдирди.
Гулноза Бобоева,
ЎзА