Олий Мажлис Сенатининг ўн биринчи ялпи мажлисида Сенат Раиси Танзила Норбоева Президентимизнинг Олий Мажлисга йўллаган Мурожаатномасидан келиб чиқиб, Сенат томонидан амалга оширилиши белгиланган устувор вазифаларга тўхталиб ўтди.
– Ҳозирда инсон ҳуқуқларига бўлган эътибор кучлики, қийноқ деган масала Ўзбекистонда кун тартибидан чиқиб кетиши керак. Бош прокуротура, Ички ишлар вазирлиги, Омбудсманнинг фаолияти таҳлил қилинганда, мазкур масалада алоҳида эътибор қаратилади ва тегишли баҳо берилади. Масъул қўмиталардан бу борадаги ўрганишлар таҳлилини янада кучайтириш талаб этилади. Қолаверса, жорий йилда суд ҳокимияти мустақиллигини таъминлашга кўмаклашувчи комиссияга раислик қилиш Сенатга ўтади. Шу мақсадда комиссия фаолиятини янада кучайтириш жорий йилда олдимизда турган энг долзарб вазифалардан биридир.
Сарфлаб бўлинган бюджетни ҳокимлар тасдиққа олиб киряпти. Бу нотўғри. Маҳаллий кенгашлар бунга йўл қўйишлари керакмас. Умуман олганда, бюджетни ижрога йўналтиришга рухсат бериш керак. Нима учун республика бюджети бир тийин маблағини Қонунчилик палатаси ва Сенатдан тасдиқлатгандан кейин, Қонун сифатида тасдиқланиб, Президент томонидан имзолангандан кейин сарфлай бошлайди. Республика даражасида бунга амал қилинади, лекин маҳаллий ҳокимликлар бунга итоат қилмайди. Биз ҳуқуқий давлатда яшаяпмиз, бунга ўрганиш керак ва қилишимиз шарт, – деди Т.Норбоева.
Нурилло НАСРИЕВ, ЎзА