Қорақалпоғистоннинг Шўманой тумани ҳокими Баҳодир Янгибаев туман халқ таълими бўлимига қарашли 33 та мактабга умумий қиймати 100 млн сўмлик китоблар совға қилди.
21 октябрь – Ўзбек тили куни ҳамда Қорақалпоғистон бўйлаб ўтказилаётган “Энг кутубхон мактаб” лойиҳаси доирасида ўтказилган тадбирда ушбу китоблар мактаб директорларига тантанали равишда топширилди.
Шўманой туманида туркман тилида дарс ўтиладиган 4 та мактабга туркман тилида чоп қилинган янги дарсликлар ва китоблар ҳам совға қилинди. Шунингдек, туман марказида уй шароитида таълим олаётган ўқувчиларнинг ҳолидан ҳам хабар олиниб, ҳоким иштирокида уларга китоблар тўплами ҳадя қилинди.
“Энг кутубхон мактаб” лойиҳасига кўра, Қорақалпоғистондаги энг кўп китоб сотиб олган мактабга “Spark” ҳамда энг кўп китоб сотиб олган туманга эса “Nexia-3” автомашинаси совға қилинади.
Шунингдек, лойиҳа якунида “Иқтидорли ўқувчи”, “Энг фаол кутубхоначи”, “Фаол мактаб директори”, “Энг фаол ОАВ ходимлари”га, шунингдек, Қорақалпоғистон Республикаси доирасида қайд этилган умумий натижаларга кўра, 2 ва 3-ўринларни эгаллаган туман халқ таълими бўлимларига қимматбаҳо совғалар тақдим қилинади.
Бундан ташқари, марказ томонидан ҳудуд бўйича олий ўқув юртида тўлов-шартнома асосида таҳсил олаётган, аммо моддий ёрдамга муҳтож зукко иккита талабага бир йиллик тўлов шартнома пуллари тўлаб берилади.