Ўзбекистон Халқаро ахборотдан умумфойдаланиш кунини нишонлашда иштирок этди

28 сентябрь куни Ўзбекистон Республикаси Бош вазир ўринбосари, UNESCO масалалари бўйича Миллий комиссия раиси Азиз Абдуҳакимов UNESCO Бош директори Одри Азуле билан бирга Халқаро ахборотдан эркин умумфойдаланиш куни (ХАУФК)ни нишонлашга бағишланган юқори даражали онлайн-муҳокамада иштирок этди.

Тадбир 28-29 сентябрь кунлари Жаҳон соғлиқни сақлаш ташкилоти, Халқаро архивлар кенгаши, БМТ Тараққиёт дастури, “Twitter” ижтимоий тармоғи, “Очиқ ҳукумат” ҳамкорлиги ташаббуси, “Transparency International” илмий-ишлаб чиқариш бирлашмаси каби етакчи ташкилот ва тузилмаларнинг раҳбарияти иштирокида ўтказилмоқда.Шу ўринда Ўзбекистон бу каби нуфузли форумга таклиф қилинган ягона мамлакат эканини алоҳида таъкидлаш муҳим. Бу Ўзбекистон Президенти Ш.М.Мирзиёев томонидан шаффофлик ва эркин фикрлиликни таъминлаш йўлида олиб борилаётган сиёсат натижасида мамлакатимизда рўй берган ўзгаришлар эътирофидир.

Тадбир тўғридан-тўғри эфирда Ташкилотнинг расмий веб-сайти ҳамда унинг барча йирик ижтимоий платформалардаги каналларида кенг ёритилди.

Ушбу сана 2019 йилда БМТ Бош ассамблеясининг 28 сентябрни Халқаро ахборотдан эркин умумфойдаланиш куни деб эълон қилишига доир резолюцияси қабул қилинганидан кейин биринчи марта глобал даражада нишонланмоқда. Бунга қадар у 2015 йида мазкур байрамни таъсис этган UNESCO доирасида нишонланган.

Ахборотнинг “COVID-19” пандемиясига қарши курашишдаги муҳим ролини инобатга олиб, тадбир мавзуси сифатида “Ахборот олиш – ҳаётларни қутқариб, ишончни мустаҳкамлаб, умид бағишлаб” танланган. Маърузачилар пандемия шароитида жамиятни ахборот билан таъминлашнинг турли жиҳатларини халқаро тузилмалар, давлат ва нодавлат ташкилотлар, шунингдек хусусий сектор нуқтаи назаридан ёритишди.

Ўзбекистон томон мамлакатда Президент Шавкат Мирзиёев бошчилигида ОАВни ривожлантириш бўйича амалга оширилаётган кенг кўламли ислоҳотларнинг асосий якунлари бўйича батафсил тақдимотини ўтказди. Ўзбекистонда ОАВни либераллаштириш ва уларнинг жамиятдаги ролини мустаҳкамлаш, сўз эркинлиги ва журналистлар ҳуқуқларини тарғиб қилиш, ҳукумат фаолияти очиқлиги ва шаффофлигини таъминлаш, давлат ташкилотлари ҳамда аҳоли ўртасидаги мулоқотни мустаҳкамлаш йўлида қилинган ишлар аниқ мисоллар билан ёритиб берилди.

Мамлакатимизда олиб борилаётган ислоҳотлар меваси ўлароқ, жамият ҳаётида ижтимоий-сиёсий фаол қатламнинг пайдо бўлаётгани, кучли фуқаролик жамияти сари илдам қадамлар қўйилаётганига алоҳида урғу бериб ўтилди.

Тадбир доирасида таъкидланишича, ахборот олиш кўламининг кенгайиши бошқа соҳалардаги ютуқлар билан бир қаторда “COVID-19” пандемиясига қарши умумқамровли стратегияни самарали амалга оширишга сезиларли таъсир кўрсатди. Мазкур стратегия тўрт асосий элементга асосланади:

1. Оммавий ахборот кампаниясини ўтказиш;

2. Вирус юқтирганлар ва қурбонлар статистикасини мунтазам равишда тақдим этиш;

3. ОАВ ва блогерларнинг дезинформация (ёлғон маълумот тарқалиши)га қарши саъй-ҳаракатларини бирлаштириш;

4. Илмий ва бошқа платформаларга онлайн киришни таъминлаш учун катта ресурсларни сафарбар этиш.

Юқори даражали онлайн-муҳокама давомида Ўзбекистон Ҳукуматининг UNESCO билан ҳамкорликдаги ХАУФК бўйича халқаро анжуманини 2021 йилнинг кузида Тошкент шаҳрида ўтказиш истаги билдирилди.

Ушбу тадбирни республикамизда ташкил қилишга доир келишувга Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги раҳбарлари Комил Алламжонов ва Саида Мирзиёева (ҳозирда Миллий масс-медиани қўллаб-қувватлаш ва ривожлантириш жамоат фонди)нинг UNESCO бош директори Одри Азуле билан 2020 йилнинг 9 январида Париж шаҳрида бўлиб ўтган учрашуви давомида эришилган.

Ўзбекистон томони кейинги йилга режалаштирилган бу анжуман давлатларда юз бериши мумкин бўлган ахборий инқирозлар ва муаммоларнинг олдини олиш ва уларга қарши курашиш йўлида UNESCO ҳамда бошқа халқаро ташкилотлар билан ҳамкорликни янада мустаҳкамлашга хизмат қилишига урғу берди.

Тадбир доирасида шунингдек профессионал журналистика ва ишончли ахборот олиш тизимини яхшилаш, чақириқларга самарали реакция билдириш борасида энг яхши тажриба билан алмашиш ва илғор технологиялар ҳамда рақамли платформалар қамровини кенгайтириш каби долзарб масалаларнинг муҳим аҳамиятга эгалиги қайд этилди.

UNESCO Бош котиби Одри Азуле ва тадбирнинг бошқа иштирокчилари Ўзбекистон Республикаси Ҳукуматига келгуси йилда бу қадар муҳим тадбирни ўтказишга тайёр эканлиги учун самимий миннатдорчилик билдиришди.

 

ЎзА