Мен оқсоқол билан бир неча марта суҳбатлашганман. Турли йиғинларда бирга бўлганман. Бу инсон Олий Мажлис Сенати Раиси ўринбосари лавозимида ҳам узоқ ва самарали меҳнат қилди.

Бугун барча қорақалпоғистонликлар Муса Ерниязов номи билан ҳақли равишда фаҳрланишади. У Қорақалпоғистон Республикасига салкам йигирма йил давомида раҳбарлик қилди. У қаерда, қандай лавозимда ишламасин, ўз халқига ватанига ҳалол хизмат қилди. Мана шу йиллар давомида қорақалпоқ юрти гуллаб яшнади. Нукус шаҳри бутунлай қайта қурилди. Республика ҳудудида юзлаб янги корхоналар фаолияти йўлга қўйилди.

Муса Ерниязов олимларни, ижодкорларни жуда қадрларди. Шунинг учун ҳам у кишининг раҳбарлиги йилларида қорақалпоқ илм-фани тараққий этди. Нукусда кўплаб олий ўқув юртлари ва филиаллар ташкил этилди. Бунёдкорлик ишлари юксалди. Одамларнинг турмуши фаровонлашди.

Муса Ерниязов Президентимиз Шавкат Мирзиёевнинг алоҳида ҳурмат ва эътиборига сазовор бўлган эди. Мамлакатимиз раҳбари фармони билан у кишига “Ўзбекистон Қаҳрамони” олий мукофоти берилган эди.

Энг муҳими Муса Ерниязов бутун қорақалпоқ халқининг қалбидан ўрин олди. Одамларнинг ишончини қозонди. Оқсоқолнинг яна бир эътироф этиш шарт бўлган томони шунда эдики, у бир умр давлатга, халққа садоқат билан хизмат қилди. Ватанимиз мустақиллигини мустаҳкамлаш, халқни рози қилиш йўлида бутун умрини бағишлади. У ватан ва халқ учун оғир ва синовли бўлган даврларда ҳам тўғри қарорлар қабул қилиши билан алоҳида эътирофга сазовор эди.

Муса Ерниязовнинг вафоти ўзбек ва қорақалпоқ халқлари учун жуда оғир йўқотиш. Мен қорақалпоқ халқига, оқсоқолнинг оила аъзоларига ҳамдардлик билдираман. Биз самарқандликлар дардингизга шерикмиз.

Муса Ерниязовнинг ёрқин хотираси қалбларимизда абадий яшайди.