Франция футболида декабрь ойи якунларига кўра “Ланс” клубининг энг яхши ўйинчисини аниқлаш мақсадида навбатдаги сўровнома ўтказилди.
Унга кўра, иқтидорли футболчимиз Абдуқодир Ҳусанов “Ланс” сафида ўтган ойнинг энг яхши футболчиси сифатида эътироф этилди. Абдуқодир сўровномада 78 фоиз овоз тўплади. Унинг энг яқин таъқибчиси Пшемислав Франковски эса 16 фоиз билан иккинчи, М’Бала Нзола эса 3 фоиз билан учинчи бўлди.
Таъкидлаш жоизки, чемпионатнинг 2024-2025 йилги мавсуми биринчи қисми олти ой давом этган бўлса, уларнинг тенг ярмида ланслик ишқибозлар айнан ўзбек легионерига энг кўп овоз бериб келган.
LE11HDF.FR сайти сўровномасининг аввалги ойлардаги энг яхши футболчилари рўйхати қуйидагича кўриниш олди:
Август: Кевин Дансо
Сентябрь: Абдуқодир Ҳусанов.
Октябрь: Абдуқодир Ҳусанов.
Ноябрь: Адриен Томассон
Декабрь: Абдуқодир Ҳусанов.
Маълумот ўрнида: Абдуқодир Ҳусанов 2024 йилда Франция чемпионати, мамлакат кубоги ва Европа лигасида жами 16 та учрашувда иштирок этиб, ҳимоядаги вазифаларини бажаришдан ташқари, битта ассист ҳам қайд этди.
Абдуқодир Ҳусановни топ клублар сотиб олишга қизиқиш билдирмоқда. Шу сабабли «Ланс» легионеримизнинг нархини ошириши кутиляпти. Эндиликда, клуб унинг трансферидан 25-30 миллион евро эмас, 40 миллион евро ишлаб олиш ниятида.
Шунингдек, Абдуқодир Ҳусанов қуйидаги кўрсаткичлар бўйича Европанинг Топ-5 чемпионатларидаги ҳимоячилар орасида етакчи бўлиб турибди:
Муваффақиятли ҳимоявий ҳаракатлар — 1-ўрин (95,40%)
Ҳужумни бошловчи узатмалар — 1-ўрин (80,70%)
Кесма узатмалар — 1-ўрин (88,80%)
Ҳимоядаги яккакурашлар — 2-ўрин (93,20%)
Йўқотилган тўпларни эгаллаб олиш — 2-ўрин (81,70%)
Узатмаларининг ўртача олислиги — 2-ўрин (47,90 м)
Жавоҳир Тошхўжаев, ЎзА