Fransiya futbolida dekabr oyi yakunlariga ko‘ra “Lans” klubining eng yaxshi o‘yinchisini aniqlash maqsadida navbatdagi so‘rovnoma o‘tkazildi.

Unga ko‘ra, iqtidorli futbolchimiz Abduqodir Husanov “Lans” safida o‘tgan oyning eng yaxshi futbolchisi sifatida e’tirof etildi. Abduqodir so‘rovnomada 78 foiz ovoz to‘pladi. Uning eng yaqin ta’qibchisi Pshemislav Frankovski esa 16 foiz bilan ikkinchi, M’Bala Nzola esa 3 foiz bilan uchinchi bo‘ldi.

Ta’kidlash joizki, chempionatning 2024-2025 yilgi mavsumi birinchi qismi olti oy davom etgan bo‘lsa, ularning teng yarmida lanslik ishqibozlar aynan o‘zbek legioneriga eng ko‘p ovoz berib kelgan.

LE11HDF.FR sayti so‘rovnomasining avvalgi oylardagi eng yaxshi futbolchilari ro‘yxati quyidagicha ko‘rinish oldi:

Avgust: Kevin Danso

Sentyabr: Abduqodir Husanov.

Oktyabr: Abduqodir Husanov.

Noyabr: Adriyen Tomasson

Dekabr: Abduqodir Husanov.

Ma’lumot o‘rnida: Abduqodir Husanov 2024 yilda Fransiya chempionati, mamlakat kubogi va Yevropa ligasida jami 16 ta uchrashuvda ishtirok etib, himoyadagi vazifalarini bajarishdan tashqari, bitta assist ham qayd etdi.

Abduqodir Husanovni top klublar sotib olishga qiziqish bildirmoqda. Shu sababli “Lans” legionerimizning narxini oshirishi kutilyapti. Endilikda, klub uning transferidan 25-30 million yevro emas, 40 million yevro ishlab olish niyatida.

Shuningdek, Abduqodir Husanov quyidagi ko‘rsatkichlar bo‘yicha Yevropaning Top-5 chempionatlaridagi himoyachilar orasida yetakchi bo‘lib turibdi: 

Muvaffaqiyatli himoyaviy harakatlar — 1-o‘rin (95,40%)

Hujumni boshlovchi uzatmalar — 1-o‘rin (80,70%)

Kesma uzatmalar — 1-o‘rin (88,80%)

Himoyadagi yakkakurashlar — 2-o‘rin (93,20%)

Yo‘qotilgan to‘plarni egallab olish — 2-o‘rin (81,70%)

Uzatmalarining o‘rtacha olisligi — 2-o‘rin (47,90 m)

Javohir Toshxo‘jayev, O‘zA