Хабарда айтилишича, оммавий ахборот воситалари ходимлари маҳаллий суд биносини ўраб олган ва тартибсизликларда иштирок этган аҳоли вакилларини суратга олаётган бўлган. Бинога федерал ҳуқуқни ҳимоя қилиш кучлари жойлаштирилган эди.Биринчи канал оператори Вячеслав Архипов норозилик иштирокчилари суд биносини ёқишга уринаётганини суратга олаётган бўлган. Шу пайт полициячилар уларни калтаклаган, камераларини тортиб олган ва асфальтга уриб синдирган. Журналистнинг ўзини ерга йиқитган. Ҳамкасбининг телефонини тортиб олган. Журналист қиз кўздан ёш оқизувчи газдан зарарланган, унга маҳаллий кўнгилли шифокорлар ёрдам кўрсатган.
Айтилишича, иккала журналистда ҳам бейжик бўлган, шунга қарамай полициячилар уларга ҳужум қилган.
Россия ташқи ишлар вазирлиги расмий вакили Мария Захарова Портленд воқеасидан кейин АҚШнинг тегишли органларини матбуот вакилларига халқаро мажбуриятларга мос муносабатда бўлишга чақирди. Унинг таъкидлашича, «АҚШ полициясининг россиялик журналистларга куч ишлатиши биринчи марта эмас».
«Ушбу воқеа муносабати билан фаолияти журналистларнинг ҳуқуқи ва эркинлигини ҳимоя қилишга қаратилган халқаро ташкилотларга яна бир бор мурожаат қилишимизга тўғри келади», – деган Мария Захарова.
Россия журналистлар уюшмаси ҳам жабр кўрган журналистларга ёрдам беришга тайёр эканини маълум қилди.
Май ойида ҳам россиялик журналистлар билан худди шундай воқеа юз берган эди. Ўшанда РИА Новости мухбири Михаил Тургиев Миннеаполисдаги норозиликларни ёритаётганда журналистлик гувоҳномасини кўрсатишига қарамай юзига қалампирли сув сепиб юборган эди.