Қорақалпоғистон Республикасининг Мўйноқ тумани ҳудудида Судочье кўли бор. Бу кўл кўплаб ноёб қушларнинг учиб ўтиши ҳамда қўним маскани ҳисобланади. Ана шундай маскан тутувчи қушларидан бири фламинголардир. Фламинго “Қизил китоб”га киритилган қуш саналади.
Судочье кўллар тизимида 2014 йили 23 май куни олиб борилган орнитологик тадқиқотлар вақтида кўлнинг шарқий чегарасидаги кичикроқ оролда фламингонинг катта уяловчи колонияси аниқланган.
Ўтган 2019 йил апрель ойида мазкур ноёб қушлар қўними кузатилган.
***
Ҳар йили май ойининг биринчи ҳафтасида Халқаро сайғоқлар куни кенг нишонланади. Ўзбекистонда мазкур сана 5 май кунига белгиланган. Бу сана бежиз танланмаган бўлиб, айнан мазкур сана атрофида сайғоқ боласи дунё юзини кўради.
Ер шарининг атиги беш ҳудудида сайғоқлар яшайди. Шулардан бири Устюрт кенгликларидир. “Қизил китоб”га киритилган сайғоқлар ҳудуд экотизимини сақлашда муҳим аҳамият касб этиб, чўлларнинг асл табиий мувозанатини барқарорлаштириш учун хизмат қилади.
ЎзА