Ваҳоланки, ҳозирги вақтда иқлим ўзгариши, озон қатламининг емирилиши, чўлланиш ва ернинг деградацияси, биохилма-хилликларнинг қисқариши, ичимлик сувининг ифлосланиши ва етишмаслиги, ўрмон ва тупроқ инқирози инсоният учун ниҳоятда долзарб глобал экологик муаммолардан бири бўлиб қолмоқда.

Шу боис ҳам БМТ қуруқ ерларни муҳофаза қилиш бўйича тадбирларни амалга оширишга кўмаклашишга қаратилган дунё мамлакатларини бирлашиб, турли лойиҳаларни амалга оширишга ундамоқда.

Шу ўринда қайд этиш керакки, ҳозирда юртимизнинг 70 фоизи табиий шўрланишга, қум кўчкилари, чангли бўронлар ва гармселлар тарқалиши таъсирига учраган қурғоқчил ва ярим қурғоқчил майдонлардан иборат. Орол фожиаси оқибатида 5,5 миллион гектардан ортиқ майдонли Оролқум чўли вужудга келган. Шунингдек, Қорақалпоғистон Республикаси, Хоразм, Навоий, Жиззах, Сирдарё, Сурхондарё ва Қашқадарё вилоятларида чўлланиш даражаси юқоридир, дейди мутахассислар.

Айни вақтда Ўзбекистон делегацияси БМТнинг чўлланишга қарши курашиш конвенцияси аъзоларининг Ҳиндистоннинг Нью – Дели шаҳрида ўтказилаётган конференциясида иштирок этмоқда. Унда Орол минтақасида амалга оширилаётган ўрмонлаштириш ишлари юзасидан тақдимот ўтказилади.

Унда Ҳиндистон бош вазири Нарендра Моди иштирок этиши кутилмоқда. Шунингдек, конференция доирасида БМТнинг чўлланишга қарши курашиш бўйича конвенциясининг ижрочи котиби жаноб Муҳаммад Тиав билан Н. Бакировнинг учрашуви белгиланган.

Унда ўзаро ҳамкорлик борасидаги масалалари муҳокама қилинади ва минтақада чанг – бўронга қарши курашиш лойиҳасини амалга ошириш бўйича меморандум имзоланиши мўлжалланган.

Конференция 11- сентябрга қадар давом этади.