Ўзбекистон Республикаси Президенти соврини учун ўтказилаётган «Ташаббус-2018» кўрик-танловининг Тошкент шаҳар Шайхонтоҳур тумани босқичи «Зарқайнар» миллий либослар галереясида бўлиб ўтди.
Тумандаги 75 тадбиркор бу кўрик-танловда қатнашиш истагини билдирган. Улар орасидан фаолияти энг яхши, деб топилган 25 тадбиркор ва 10 ҳунарманд саралаб олинди.
Кўрик-танловда сўзга чиққан Шайхонтоҳур тумани ҳокими Ш.Муҳаммадхоновнинг таъкидлашича, мамлакатда тадбиркорларнинг эмин-эркин фаолият юритиши учун зарур ҳуқуқий асослар яратилган. Бу ишбилармон доира вакиллари фаолиятининг самарадорлигига хизмат қилади.
…Бир қарашда мўъжаз, аммо нозик дид ва маҳорат билан ясалган нақшинкор ёғоч қутичаларга ҳавас билан қараймиз. Қўл меҳнати маҳсули – сувенир буюмлар, айниқса, хорижлик сайёҳлар учун ажойиб совға. Уста миниатюрачи-наққош Камолиддин Абдуллаевнинг айтишича, тадбиркору ҳунармандларнинг ишини элга танитишда «Ташаббус» кўрик-танлови ўзига хос намойиш майдонига айланган.
Танлов якунида номинациялар бўйича ғолиблар аниқланди. Улар «Ташаббус-2018» кўрик-танловининг Тошкент шаҳар босқичида иштирок этиш имкониятини қўлга киритди.
Н.Усмонова, ЎзА