Ижтимоий тармоқларда мамлакатимизга хам Гонконг гриппи кириб келгани айтилмоқда. Бу қанчалик тўғри?
Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабековнинг айтишича, ҳозир ўткир респиратор касалликлар тарқаладиган мавсумий давр ҳисобланади. Санитария-эпидемиологик осойишталик ва жамоат саломатлиги қўмитаси томонидан ҳудудимизда айланиб юрган вируслар мониторинг қилиб борилади. Мониторинг натижасида асосан гриппнинг А тури H3N2 штамми ҳамда гриппнинг бошқа турлари айланиб юргани тўғрисида маълумот бор.
– H2N2 1960 йил Гонконгда тарқалган вирус. Яъни ўша йилларда H2N2 вирусидан мутация бўлиб шаклланган вирус сифатида тарқалган ва бир неча Шарқ мамлакатларида муаммоли вазиятларни келтириб чиқарган. Ҳозир бу оддий мавсумий грипп вируси ҳисобланади. Ишлаб чиқарилган вакциналарнинг барчаси ушбу вирусга нисбатан ишлайди.
Ўзбекистон Республикасида ҳозиргача ишлатилган 2 миллион 200 минг доза вакцина бевосита мана шу штаммга қарши ишлайдиган вакцинадир. Бундан ташқари яна уч турдаги вакцина Ўзбекистон ҳудудида хусусий эмлаш пунктларида мавжуд. Улар ҳам бевосита бу йил мавсумий тарқалиши кутилаётган гриппнинг айнан шу штаммига қарши ишлайдиган қилиб тайёрланган.
Шундай экан, жиддий хавотирланишга ёки бўлмаса ўзимиздан ўзимиз қандайдир Гонконг вируси қайтяпти, деган ваҳимани ясаб олишимизга ҳеч қандай асосни кўраётганим йўқ. Бу оддий мавсумий вирус эканлигини яна бир бор айтиб ўтаман, – дейди Нурмат Отабеков.
Демак, юртимизга Гонконг гриппи кириб келгани рост. Аммо бу мутасадди таъкидлаганидек, ваҳимали ҳолат эмас.
Моҳигул Қосимова, ЎзА