Жорий йилнинг 23 сентябрь – 8 октябрь кунлари мамлакатимиз спортчилари Хитойда ўтказиладиган “Ханчжоу-2022” Осиё ўйинларида ватанимиз шарафини ҳимоя қилади.

Бошланишига 31 кун қолган қитъа ўйинларида мамлакатимиз спортчилари нечта спорт турида қанча спортчи билан иштирок этади? «Ханчжоу-2022″да совринли ўринларни эгаллаган спортчиларга давлатимиз томонидан бериладиган мукофот пулларининг миқдори қанча бўлади? Шу каби саволлар кўпчиликни қизиқтириши табиий ҳол, албатта.

Айтиш лозим, давлатимиз раҳбари томонидан 2022 йилнинг 5 майида имзоланган “2023 йилда Ханчжоу шаҳрида (Хитой) бўлиб ўтадиган XIX Осиё ўйинлари ва IV Параосиё ўйинларига Ўзбекистон спортчиларини комплекс тайёрлаш тўғрисида”ги қарорга асосан терма жамоалар, алоҳида спортчилар учун барча шарт-шароитлар тўла-тўкис яратиб берилди.

Ички ва халқаро ўқув-машғулот йиғинлари, зарур маблағ, тиббий кўмак, ижтимоий ва иқтисодий қўллов ҳамма даврлардагидан-да юқори бўлди. Яратилган имкониятга муносиб бўлиш спортчиларимизнинг салоҳиятига, мураббий-мутахассисларнинг техник-тактик ҳаракатига боғлиқ бўлиб қолмоқда.

Қарорга асосан Осиё ва Параосиё ўйинларида олтин медални қўлга киритган спортчилар 5 000 АҚШ доллари миқдорида мукофотланса, кумуш ва бронза медали соҳиблари 3 минг ва 2 минг АҚШ доллари билан, уларни тайёрлаган тренерлар 2500, 1500 ҳамда 1000 АҚШ доллари билан тақдирланади.

Бундан ташқари, Осиё ва Параосиё ўйинларида ғолиб ва совриндор бўлган Ўзбекистон спортчиларини тайёрлаган бошқа мутахассислар 2 000,  1 000, 500 АҚШ доллари миқдорида ҳар бир медаль учун бир марталик пул мукофотлари билан рағбатлантирилиши назарда тутилган.

Шунингдек, қарорга асосан «Ханчжоу-2022» ўйинларида ғолиб ва совриндор спортчилар ва уларни тайёрлаган тренерлар қўшимча равишда маҳаллий бюджет маблағлари ҳисобидан қуйидаги миқдорда бир марталик пул мукофотлари билан рағбатлантирилади:  

а) Осиё ва Параосиё ўйинларида ғолиб ва совриндор бўлган Ўзбекистон спортчилари:  

олтин медаль учун — базавий ҳисоблаш миқдорининг 300 баравари миқдорида;  

кумуш медаль учун — базавий ҳисоблаш миқдорининг 200 баравари миқдорида;  

бронза медаль учун — базавий ҳисоблаш миқдорининг 100 баравари миқдорида рағбатлантирилади;  

б) Осиё ва Параосиё ўйинларида ғолиб ва совриндор бўлган Ўзбекистон спортчиларини тайёрлаган тренерлар:  

олтин медаль учун — базавий ҳисоблаш миқдорининг 200 баравари миқдорида;  

кумуш медаль учун — базавий ҳисоблаш миқдорининг 100 баравари миқдорида;  

бронза медаль учун — базавий ҳисоблаш миқдорининг 50 баравари миқдорида.  

Эслатиб ўтамиз, Хитойда ўтказиладиган «Ханчжоу-2022» Осиё ўйинларида мамлакатимизнинг 400 нафардан зиёд спортчи ёшлари 39 та спорт туридаги баҳсларда ватанимиз шарафини ҳимоя қилиши кутилмоқда.

Т.Рўзиев, ЎзА