Бола ҳуқуқлари бўйича вакил Алия Юнусованинг шахсий қабулига 11 ёшли бола мурожаат билан келган.
Бувиси билан бирга келган Н.Р. отаси вафот этганини, онаси, опаси, акаси ва синглиси билан яшашини, лекин уйдаги муаммоли вазият туфайли бувисиникига қочиб келганини маълум қилган.
– Боланинг сўзларига кўра, бир куни онаси билан карта ўйнаганида карта ерга тушиб кетгани учун онаси унинг кўкрак қафасига пичоқ билан урган, бундан боланинг танасида чандиқ қолган, – дейди А.Юнусова. – Онаси доимий равишда алкоголли ичимликлар ичиб келган ва болага яхши муносабатда бўлмаган. Болакай ҳатто мактабга ҳам бормаган. У бувиси билан яшашни хоҳлашини, шунга ёрдам беришимизни сўради.
Масала жойига чиқиб ўрганилди. Бола ҳуқуқлари бўйича вакил А.Юнусова, Бола ҳуқуқларини таъминлаш сектори вакили ҳамда маҳалла хотин-қизлар фаоли боланинг онаси Ф.Р.нинг хонадонида бўлганда, у ўзини одобсизларча тутиб, хонадон эшигини очмасдан, барчани ҳақоратлаб, кетишларини талаб қилган.
Ҳолат юзасидан тезкорлик билан ҳамкор ташкилотлар, жумладан, ички ишлар органлари ходимлари билан бирга иш олиб борилди. Шу куни Ф.Р.нинг спиртли ичимликлар таъсирида бўлгани ва бу ҳолат сурункали равишда давом этиб келаётгани, уйининг санитария ҳолати қониқарли эмаслиги ва унинг қарамоғида бўлган болалар ғамҳурликсиз қолгани аниқланди.
Ф.Р. даволаниш учун тиббий муассасага жойлаштирилди. Болалар онаси даволаниб оиласига қайтгунча Вояга етмаганларга ижтимоий ҳуқуқий ёрдам кўрсатиш марказига жойлаштирилди. Болаларга ҳуқуқий, тиббий ва ижтимоий ёрдам кўрсатилмоқда.
Эслатиб ўтамиз, давлат боланинг шахси, уй-жойи дахлсизлигини, хат-хабарлари сир тутилишини таъминлайди ҳамда болани эксплуатация ва зўравонликнинг барча шаклларидан, шу жумладан, жисмоний, руҳий ва жинсий зўравонликдан, қийноқларга солишдан ёки шафқатсиз, қўпол ёхуд инсон қадр-қимматини камситувчи бошқа шаклдаги муомаладан, шаҳвоний шилқимликлардан, ҳуқуқбузарликлар ва ғайриижтимоий ҳаракатлар содир этишга жалб этилишидан ҳимоя қилади.
Н.Абдураимова,
ЎзА