Хабар берганимиздек, Тошкентда “CAFA Nations Cup 2023″нинг “А” гуруҳи ўйинлари бўлиб ўтмоқда.
Кеча, 11 июнь куни “Бунёдкор” стадионида мусобақанинг тантанали очилиш маросими ташкил этилди ҳамда “CAFA Nations Cup 2023″нинг “А” гуруҳи 1-тур ўйинида Ўзбекистон миллий терма жамоаси Ўмон жамоасига қарши майдонга тушди.
Терма жамоамизнинг тўлиқ устунлигида ўтган учрашувнинг 7 ва 24-дақиқаларида Жалолиддин Машарипов ва 89-дақиқада Хожиакбар Алижоновнинг киритган голлари натижасида ҳамюртларимиз 3:0 ҳисобида ўмонликларни мағлуб этди.
Гуруҳнинг иккинчи жуфтлигидаги Тожикистон – Туркманистон учрашувида томонлар муроса йўлини танлади – 1:1.
Якунланган 1-тур ўйинларидан кейин Ўзбекистон терма жамоаси аъзолари “А” гуруҳда 3 очко жамғарган ҳолда пешқадамликка эришган бўлса, Тожикистон ва Туркманистон жамоалари ҳисобида 1 очкодан мавжуд. “CAFA Nations Cup 2023″нинг “А” гуруҳидаги 2-тур баҳслари 14 июнь куни ўтказилади. Унда Ўмон – Тожикистон ва Ўзбекистон – Туркманистон жамоалари тўқнаш келади.
Қирғизистонда ташкил этилаётган “CAFA Nations Cup 2023″нинг “Б” гуруҳидаги Эрон, Қирғизистон ва Афғонистон жамоалари ўртасидаги ўйинлар натижасига разм солсак, бугунгача гуруҳдаги битта учрашув ўтган бўлиб, унда Афғонистонни 1:0 ҳисобида енгган Қирғизистон жамоаси 3 очкога эга бўлиб олди.
“Б” гуруҳидаги навбатдаги Эрон – Афғонистон учрашуви эртага, 13 июнь куни ташкил этилади.
“CAFA Nations Cup 2023″нинг гуруҳ ўйинлари 17 июнгача ўтказилади. Гуруҳларда 1-ўринни эгаллаган жамоалар 1-ўрин учун финалда рўбарў келса, 2-ўринни эгаллаган жамоалар ярим финалда 3-ўрин учун кураш олиб боради.
Эслатиб ўтамиз, финал ва 3-ўрин учун баҳслар 20 июнь куни пойтахтимиздаги “Пахтакор” ва “Бунёдкор” стадионларида бўлиб ўтади.
Т. Рўзиев, ЎзА