Қишлоқ хўжалиги вазирлиги матбуот хизмати раҳбари Дилшод Назировнинг маълум қилишича, жорий йил ҳосили учун республика бўйича 134 та пахта-тўқимачилик кластерлари томонидан 1 миллион 20 минг гектар майдонга чигит экиш режалаштирилган.
Бугунги кунда чигит экиладиган 243,5 минг гектар майдонда пушта олиш ишлари олиб борилмоқда. Пушта олинган майдонларнинг 62 минг гектарида пуштага нам суви берилиб, қолган майдонларга нам суви бериш ишлари ташкил этилган.
Шунингдек, 478,2 минг гектар майдонда шўр ювиш агротехник тадбирлари амалга ошириш белгиланган бўлиб, ушбу тадбирлар Қорақалпоғистон Республикаси ва Хоразм вилоятларидан ташқари барча ҳудудларда якунланди. Экиш ишларида қатнашадиган жами 142 мингдан зиёд қишлоқ хўжалиги техникалари ва агрегатлари мавсумга тайёр ҳолатга келтириб қўйилди.
Ҳозирда ҳудудларда тупроқнинг етилишига қараб чигит экишга ер тайёрлаш ишлари бошланмоқда. Бугунги кунда Андижон, Бухоро, Жиззах, Қашқадарё, Сурхондарё, Тошкент ва Фарғона вилоятларида ер тайёрлаш ишлари бошлаб юборилди.
Бу йилги сув тақчиллиги шароитида чигит экиш учун ерлар ўз вақтида ва сифатли тайёрланса, тупроқнинг табиий намига чигит экиб кўчатлар тўлиқ ундириб олинса, чигит суви учун бериладиган дарё сувини тежаб қолиш имконияти яратилади.
Бунинг учун далага кириш имкони бўлиши билан чигит тупроқнинг табиий намига экиладиган майдонларда тупроқнинг юза (8-10 см) қатлами борона билан юмшатилиши лозим. Мазкур тадбир кечиктириб ўтказилса, тупроқнинг чигит экиладиган қатламидаги намлик буғланиб кетиши ҳамда бегона ўтларнинг кўпайиши натижасида ниҳол текис ундириб олинмаслиги мумкин.
Бундан ташқари, тупроғи шўрланмаган, намлик ва ёғингарчилик миқдори кам бўладиган, пушта олиниб чигит экиладиган ҳудудларида экиш олдидан енгил, яъни гектарига 600-700 м3 меъёрда нам тўплаш сувини бериш (пуштани суғориш) керак. Бунда чигитни бир текис ундириб олиш билан биргаликда ғўзани гуллаш давригача суғориш сувини тежаш имконияти яратилади.
Муҳайё Тошқораева, ЎзА