Фарғона вилояти ҳокими Хайрулло Бозоров Германия трикотаж ишлаб чиқарувчилар конфедерацияси (Gesamtmasche) ҳамда Sequa халқаро ҳамкорликни ривожлантириш ташкилоти вакилларини қабул қилди.
Маълумки, бу икки тузилма халқаро ҳамжамиятда ўрта бўғинда меҳнат бозорида рақобатбардош мутахассислар тайёрлаш, қайта тайёрлаш ва малакасини ошириш борасида катта салоҳиятга эга. Шу боис дунёнинг кўплаб мамлакатларида ишончли ҳамкор сифатида самарали ҳамкорликни йўлга қўйган.
Учрашувда вилоятдаги текстиль соҳасида фаолият олиб бораётган ишчи-ходимларнинг малакасини ошириш, уларга замонавий технологиялар билан ишлаш борасида кўникмалар бериш ҳамда Фарғона пахта-тўқимачилик саноати маҳсулотларини Германия, шу билан бирга Европа бозорларига экспорт қилиш имкониятларини кенгайтириш ҳисобига икки томонлама ҳамкорлик кўламини кенгайтириш масалалари муҳокама қилинди.
Айни жараёнда вилоятда фаолият кўрсатаётган пахта-тўқимачилик кластерлари билан фаол ҳамкорлик қилиш масалалари бўйича ўзаро фикр алмашилди. Германия трикотаж ишлаб чиқарувчилар конфедерацияси бош менежери Силвиа Жангбауер қабул учун миннатдорлик билдириб, 2022 йил октябрь ойида вилоятга ташрифи давомида текстиль соҳасида замонавий технологиялар билан ишлай оладиган ишчи-мутахассисларни ўқитиш, қайта тайёрлаш бўйича ҳамкорликда ишлаб чиқилган лойиҳа янада такомиллаштирилганини таъкидлади. Истиқболли лойиҳа тасдиқланиб ижросига киришилса у Ўзбекистонда биринчи бўлиб Фарғона вилоятида ҳаётга татбиқ этилишидан беҳад мамнун бўлишини маълум қилди.
Мулоқотда вилоят ҳокими текстиль соҳасида халқаро миқёсда малакали мутахассислар тажрибасини ўрганишга эҳтиёж борлигига эътибор қаратиб, бу лойиҳани ҳар томонлама қўллаб-қувватлашга тайёрлигини билдирди. Бу борада Қўштепа туманида жойлашган “Оқтепа” кичик саноат зонасидаги “Global textile infinity” корхонасида Муҳандислик мактаби фаолияти йўлга қўйилаётганини айтиб, хорижлик мутахассисларни ўзаро ҳамкорликда ишлашга таклиф этди. Ўз навбатида германиялик ҳамкорлар таклифни маъқуллаб, Муҳандислик мактаби жойи билан танишиш ва ҳамкорликда иш ташкил этишга қизиқиш билдирди.
Мулоқотда текстиль соҳаси ривожига ҳисса қўшиши кутилаётган мазкур лойиҳа Ўзбекистон – Германия ўртасида яна бир йўналишда ҳамкорликни кенгайтиришда ғоятда аҳамиятли эканлиги қайд этилди.
М.Сулаймонов, ЎзА