Franciyanıń Parij qalasında Ózbekstan tallaw oraylarınıń delegaciyası «Oraylıq Aziyadaǵı integraciya processleriniń áhmiyetli máseleleri hám Ózbekstan hám Evropa Awqamı arasındaǵı qarım-qatnastı keńeytiw» temasındaǵı dógerek sáwbetinde qatnastı. Sapar sheńberinde evropalı birge islesiwshiler menen bir qatar ushırasıwlar ótkerildi.
Ilaj «Rawajlanıw strategiyası» orayı, Ózbekstan Respublikasınıń Franciyadaǵı elshixanası hám Evropa rawajlanıw hám qáwipsizlik institutı (IPSE) menen birgelikte shólkemlestirildi.
Dógerek sáwbetinde Ózbekstan hám Franciyanıń jetekshi tallaw oraylarınıń wákilleri, diplomatlar, siyasatshılar hám Evropanıń hár qıylı mámleketlerinen 40qa shamalas xalıqaralıq ekspertler qatnastı.
Sonday-aq, xalıqaralıq ilajda Ózbekstan ekspertler jámiyetinen «Rawajlanıw strtaegiyası» orayı, Strategiyalıq hám regionlararalıq izertlewler institutı, Еkonomikalıq izertlewler hám reformalar orayı, Oraylıq Aziya xalıqaralıq institutı hám Sırtqı siyasiy izertlewler orayınıń basshıları hám jetekshi analitikleri bayanat jasadı.
Sonıń ishinde, Ózbekstan hám Franciya arasındaǵı qatnasıqlardıń házirgi jaǵdayı hám perspektivaları, sonday-aq, «Ózbekstan-Evropa Awqamı» formatındaǵı birge islesiw haqqında maǵlıwmat berip ótildi. Hár qıylı tarawlardaǵı óz-ara paydalı baylanıslardı jáne de rawajlandırıwdıń tiykarǵı baǵdarları menen baylanıslı máseleler jarıtıp berildi.
Házirgi kúnde Oraylıq Aziyada bolıp atırǵan regionallıq birge islesiw hám integraciyanıń rawajlanıwı, atap aytqanda, regionallıq birge islesiw institutcionallasıwınıń perspektivaları hám «Oraylıq Aziya plyus» formatındaǵı kóp tárepleme birge islesiw máselelerine toqtap ótildi.
Óz gezeginde Franciya tárepi Ózbekstanda ámelge asırılıp atırǵan reformalarǵa úlken qızıǵıwshılıq bildirip, Evropa Awqamı hám oǵan aǵza mámleketler ushın mámleketimiz benen birge islesiwdi jáne de jedellestiriw zárúr ekenligin atap ótti, delinedi «Rawajlanıw strategiyası» orayınıń maǵlıwmatında.
Sonıń ishinde, Evropa rawajlanıw hám qáwipsizlik institutınıń direktorı Е.Dyupyui Ózbekstan Franciyanıń Oraylıq Aziyadaǵı áhmiyetli sherigi ekenligine hám eki tárepleme siyasiy, ekonomikalıq hám mádeniy-gumanitarlıq birge islesiw jedel rawajlanıp atırǵanlıǵına itibar qarattı.
IPSE basshısınıń sózlerine bola, Ózbekstanda sońǵı jılları unamlı ózgerisler baqlanbaqta, mámleket ashıq hám teń salmaqlı sırtqı siyasat alıp barmaqta hám Oraylıq Aziya regionında qáwipsizlik hám turaqlılıqtı támiyinlewde áhmiyetli rol atqarmaqta.
Ilaj sońında Franciya hám Evropanıń basqa mámleketlerinen kelgen siyasiy hám ekonomikalıq toparlardıń wákilleri Ózbekstannıń jetekshi tallaw orayları hám bilimlendiriw mákemeleri menen birge islesiwdi jáne de rawajlandırıwdan mápdar ekenligin bildirdi.
M.Hojiakbarova, ÓzA