Húrmetli kásiplesler!
Húrmetli májilis qatnasıwshıları!
Global hám regionallıq qáwipler, ekonomikadaǵı turaqlılıq hám dúnya bazarındaǵı ózgeriwsheńliktiń kúsheyiwi mámleketlerimiz arasındaǵı sheriklikti keńeytiwdiń jańa jolların jáne de jedel izlewdi talap etpekte.
Sońǵı bir neshe jıl ishinde Ózbekstan baqlawshı mámleket sıpatında EAЕA menen 22 baǵdarda nátiyjeli birge islesiwdi jolǵa qoyǵanlıǵın atap ótiw kerek. Bıyılǵı jılı Awqam mámleketleri menen tovar almasıwımız 11 procent ósti.
Oktyabr ayında Evroaziya ekonomikalıq komissiyası menen Jańa úsh jıllıq rejeni qabıl ettik, oǵan sawda, sanaat, qarjı sektorı, agrokompleks, transport hám basqa tarawlarda qırıqqa shamalas ilajlar kirgizildi.
Sonday-aq, biz sawda hám júk tasıwdı sanlastırıw, elektron kommerciyanı engiziw, klimat ózgeriwine qarsı gúresiw tarawındaǵı tarmaq baǵdarlamalarında jedel qatnasıw niyetindemiz.
Bunnan tısqarı, Ózbekstan Húkimeti birgeliktegi Jumısshı toparınıń gezektegi, tórtinshi májilisine puqta tayarlıq kórmekte. Bul ushırasıwdı kelesi jılı mart ayında Ózbekstanda ótkeriwdi usınıs etemiz.
Húrmetli kásiplesler!
Ózbekstan menen Evroaziya ekonomikalıq awqamı arasındaǵı birge islesiwdi keńeytiwdiń áhmiyetli baǵdarları boyınsha kózqaraslarımızdı qısqasha bildirmekshimen.
Birinshi. Bul sawda tosıqların basqısha-basqısh saplastırıw boyınsha muwapıqlastırılǵan ilajlardı ámelge asırıw bolıp tabıladı.
Ózbekstan hám EAЕA arasında sawdada tarif hám tarif emes sheklewlerdi óz-ara qollanbaw haqqındaǵı kelisimge qol qoyıw máselesin ekspertler dárejesinde islep shıǵıwdı usınıs etemiz.
Jaqın waqıt ishinde ámeliy háreketler rejesin qabıl etken halda texnikalıq jaqtan tártipke salıw sisemaların jaqınlastırıw boyınsha másláhátlesiwler ótkeriwge tayarmız.
Ekinshi. Ózbekstannıń qol qoyılıp atırǵan Birden-bir bajıxana tranzit sisteması haqqındaǵı kelisimde qatnasıwı hám sawda ámeliyatların keńeytiwge xızmet etedi, dep esaplayman.
Mámleketlerimizdiń bajıxana shegaraları arqalı alıp ótilip atırǵan tovarlar hám transport quralları haqqındaǵı maǵlıwmatlardı elektron almasıw boyınsha kelisimlerdi kelisiwdi jedellestiriw úlken áhmiyetke iye.
Úshinshi. Birlespe sheńberinde baslanǵan sanaat kooperaciyasın hám óndiristi lokalizaciyalaw baǵdarlamaların qollap-quwatlaw mexanizmleri hám qurallarına qosılıwdan mápdarmız.
Bunnan tısqarı, birgeliktegi joybarlardı alǵa qoyıw ushın isenimli qarjı dereklerin qáliplestiriw maqsetinde kelesi jıldıń basında tártip-qaǵıydalardı juwmaqlastırıp, Evroaziya rawajlanıw bankine aǵza bolıwdı rejelestirmektemiz.
Tórtinshisi. Sanlı texnologiyalar hám jasalma intellekt tarawında sistemalı birge islesiwdi kúsheytiw niyetindemiz.
Ózbekstandı EAЕAnıń integraciyalasqan málimleme sistemasına hám “Sanlı awqam” joybarına jalǵaw máselelelirn birgelikte islep shıǵıwǵa tayarmız.
Besinshi. Agrar tarawda kooperaciya baǵdarlamasın tayarlaw tárepdarımız. Gáp awıl xojalıǵı ónimleriniń bazarlarımızǵa óz-ara kirip barıwın jeńillestiriw, innovaciyalıq agrosanaat joybarların ámelge asırıw, aldınǵı ilimiy qollanbalardı engiziw ilajları haqqında barmaqta.
Atınshı. Turistlik almasıwlardı xoshametlew maqsetinde Birlespe mámleketleri puqaralarına mámleketimizge ishki hújjetler menen kiriw imkaniyatın beretuǵın tártipti engiziw niyetindemiz.
Húrmetli kásiplesler!
Ózbekstan potencialdan nátiyjeli paydalanıw maqsetinde EAЕA boyınsha sherikler menen tıǵız hám nátiyjeli birge islesiwdi rawajlandırıw táreptarı.
Pursattan paydalanıp, húrmetli Aleksandr Grigorevich Lukashenkonı shólkemge basshılıq Belarusqa ótiwi múnásibeti menen qutlıqlayman hám oǵan tabıslar tileymen.
Bársheńizdi, tuwısqan xalıqlarımızdı kirip kiyatırǵan Jańa jıl bayramı menen jáne bir márte qızǵın qutlıqlap, abadanlıq hám rawajlanıw tileymen.
Itibarıńız ushın raxmet.

ÓzA