Ózbekstan Respublikası Prezidenti Shavkat Mirziyoev 26-dekabr kúni Sankt-Peterburg qalasında Joqarı Evroaziya ekonomikalıq keńesiniń gezektegi májilisinde baqlawshı statusında qatnastı.

Armeniya Respublikasınıń Bas ministri Nikol Pashinyannıń basshılıǵında (onlayn formatta) ótken bul gezektegi ushırasıwda Belarus Respublikası Prezidenti Aleksandr Lukashenko, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Rossiya Federaciyası Prezidenti Vladimir Putin, sonday-aq, EAЕA janındaǵı baqlawshı mámleket – Iran Islam Respublikası sanaat, kánler hám sawda ministri Said Muhammad Otabak ta qatnastı. Kuba Respublikası Prezidenti Migel Dias-Kanel qatnasıwshılarǵa videomúrájat jolladı.
Kún tártibinen kóp tárepleme sawda-ekonomikalıq birge islesiwdi qollap-quwatlaw, birge islesiwdiń tiykarǵı baǵdarlarında birgeliktegi baǵdarlamalardı ámelge asırıw máseleleri orın aldı.
Ózbekstan Prezidenti shıǵıp sóylegen sóziniń basında sońǵı jıllarda mámleketimiz baqlawshı sıpatında Evroaziya ekonomikalıq awqamı menen 22 baǵdarda nátiyjeli birge islesiwdi jolǵa qoyǵanın atap ótti.
2024-jılı Ózbekstannıń awqam mámleketleri menen tovar almasıw kólemi 11 procentke arttı. Oktyabr ayında Evroaziya ekonomikalıq komissiyası menen sawda, sanaat, qarjı, awıl xojalıǵı, transport hám basqa tarawlarda 40qa shamalas ilajlardı óz ishine alǵan Jańa úsh jıllıq birge islesiw rejesi qabıl etildi.
Ózbekstan, sonday-aq, EAЕAnıń sawda hám júk tasıwdı sanlastırıw, elektron kommerciyanı engiziw, klimat ózgeriwine qarsı gúresiw tarawındaǵı bir qatar tarmaq baǵdarlamalarında belsene qatnaspaqta.
Kelesi jıldıń mart ayında birgeliktegi Jumısshı toparınıń tórtinshi májilisine tayarlıq kórilmekte.
Mámleketimiz basshısı Evroaziya ekonomikalıq awqamı menen óz-ara paydalı birge islesiwdiń tiykarǵı baǵdarlarına ayrıqsha toqtap ótti. Atap aytqanda, Prezidentimiz óz-ara sawdadaǵı sawda tosqınlıqların basqıshpa-basqısh saplastırıwǵa shaqırdı. Usı kózqarastan, Ózbekstan hám EAЕA mámleketleri arasındaǵı sawdada tarif hám tarif emes sheklewlerdi qollanbaw máselesin ekspertler dárejesinde islep shıǵıw usınıs etildi.
Ámeliy háreketlerdiń rejesin qabıl etken halda, jaqın keleshekte texnikalıq jaqtan tártipke salıw sistemaların jaqınlastırıw boyınsha másláhátlesiwler ótkeriwge tayarlıq bildirildi.
Ózbekstan jetekshisi ilaj juwmaǵında qol qoyılıp atırǵan Birden-bir bajıxana tranziti sisteması haqqındaǵı kelisimde mámleketimizdiń qatnasıwı, sonday-aq, bajıxana shegaraları arqalı alıp ótilip atırǵan tovarlar hám transport quralları haqqındaǵı elektron maǵlıwmatlardıń almasıwın tez pursatta engiziw tárepdarı ekenin atap ótti.
Sanaat kooperaciyası hám lokalizaciyalaw baǵdarlamaların qollap-quwatlaw mexanizmleri hám qurallarına qosılıwdan mápdar ekeni bildirildi.
-Birgeliktegi joybarlardı alǵa qoyıw ushın isenimli qarjılay dereklerdi qáliplestiriw maqsetinde kelesi jıldıń basında tártip-qaǵıydalardı juwmaqlastırıp, Evroaziya rawajlanıw bankine aǵza bolıwdı rejelestirmektemiz, – dedi Prezidentimiz.
Biznesti jáne de jedel tartıw hám isbilermenlik qatnasıqların bekkemlew ushın qolaylı sharayatlar jaratıw maqsetinde EAЕA Isbilermenler keńesiniń májilisin 2025-jılı aprel ayında Tashkent qalasında ótkeriw usınıs etildi.
Sanlı texkologiyalar hám jasalma intellekt tarawında sistemalı birge islesiw áhmiyetli ekenligi atap ótildi. Mámleketimizdi EAЕAnıń integraciyalasqan málimleme sistemasına hám “Sanlı awqam” joybarına jalǵaw baslaması alǵa qoyıldı.
Agrar tarawda awıl xojalıǵı ónimlerin óz-ara jetkerip beriwdi jeńillestiriw, innovaciyalıq agrosanaat joybarların ámelge asırıw hám ilimiy qollanbalardı engiziwge qaratılǵan kooperaciya baǵdarlamasın tayarlaw usınıs etildi.
Turistlik almasıwlardı xoshametlew maqsetinde mámleketimiz basshısı EAЕA mámleketleri puqaralarına Ózbekstanǵa ishki hújjetler menen kiriw imkaniyatın beretuǵın tártipti engiziwge tayar ekenligin bildirdi.
Sonıń menen Ózbekstan Respublikası Prezidenti Shavkat Mirziyoevtiń Sankt-Peterburg qalasına ámeliy saparı juwmaqlandı.

“Pulkovo” xalıqaralıq aeroportında joqarı mártebeli miymandı Sankt-Peterburg qalasınıń gubernatorı Aleksandr Beglov hám basqa rásmiy shaxslar shıǵarıp saldı.

ÓzA