Sońǵı jılları elimizde Prezidentimizdiń basshılıǵında barlıq tarawlar sıyaqlı, densawlıqtı saqlaw tarawında da kóplegen unamlı isler ámelge asırılıp, medicina mákemeleriniń materiallıq-texnikalıq bazasın bekkemlew, olardı tereń bilimge iye jetik qánigeler menen támiyinlewge ayrıqsha itibar qaratılmaqta.
Usınday sociallıq obyektlerdiń qatarında Tórtkúl rayonında jańadan qurıp pitkerilgen rayonlıq medicina birlespesine qaraslı tuwıw kompleksin aytıp ótsek boladı.
Ózbekstan Respublikası Prezidentiniń 2023-jıl 25-dekabrdegi «2024-2026-jılarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararı tiykarında 13 mlrd. sum qarjı ajıratılıp, tuwıw kompleksine qosımsha 70 orınlıq jańa imarat qurıldı hám bul imarat jańa jıl aldında xalıq iygiligi ushın paydalanıwǵa tapsırıldı.
Komplekstiń tapsırılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev ilaj qatnasıwshıların jańa jıl bayramı hám tuwıw kompleksiniń paydalanıwǵa tapsırılıwı menen qızǵın qutlıqlap, sońǵı jılları elimizde húrmetli Prezidentimizdiń itibarı hám ǵamqorlıǵı menen sociallıq hám infrastruktura obyektlerinde oǵada kólemli qurılıs-ońlaw jumısları ámelge asırılıp atırǵanın atap ótti.
Haqıyqatında da, jańa imarattıń paydalanıwǵa tapsırılıwı xalıq iygiligi jolındaǵı ámeliy jumıslardıń jáne bir ayqın kórinisi boldı desek aljaspaǵan bolamız. Komplekstiń tapsırılıwı menen aymaq xalqı, sonıń ishinde, analar hám balalar ushın barlıq qolaylı sharayatlar jaratıldı.
Qaraqalpaqstan xabar agentligi