Qaraqalpaqstan Respublikası Densawlıqtı saqlaw ministrligi Málimleme xızmeti, ǵalaba xabar qurallarınıń wákilleri, medicina xızmetkerleriniń qatnasıwında U.Xalmuratov atındaǵı Respublika kóp tarmaqlı emlew orayına media-tur shólkemlestirildi.
Dáslep ǵalaba xabar quralları wákilleri ushın baspasóz konferenciyası ótkerilip, onda emlew orayı bas shıpakeriniń orınbasarı M.Xaytbaev oray tárepinen 2024-jılda ámelge asırılǵan jumıslar hám aldaǵı rejeleri haqkında maǵlıwmat berildi.
Atap ótilgenindey, U.Xalmuratov atındaǵı Respublika kóp tarmaqlı emlew orayı tárepinen densawlıqtı saqlaw sistemasındaǵı reformalarǵa tiykarlanıp ámelge asırılıp jumıslardı jedellestiriw, emlew profilaktikalıq mákemeleriniń materiallıq-texnikalıq bazasın bekkemlew hám mámleketlik baǵdarlamalardı orınlaw boyınsha ilajlar nátiyjeli dawam ettirilmekte.
Búgingi kúni emlew orayındaǵı emlew bólimleriniń sanı 13 ke, kosımsha bólimler sanı 19 ǵa, orınlar sanı 375 ke jetti.
Orayda diagnostikalıq, emlew hám profilaktikalıq jumıslardıӊ kólemi keӊeytildi, jaӊadan laboratoriyalıq diagnostikalık tekseriw usılları engizildi.
Tashkent kalasındaǵı Respublika qánigelestirilgen ilimiy-ámeliy medicina oraylarınıń, atap aytqanda, travmatologiya hám ortopediya, neyroxirurgiya, urologiya, xirurgiya, angionevrologiya, terapiya hám reabilitaciya, nefrologiya, gematologiya, allergologiya oraylarınıń 9 filialı bar. Orayda Mámleketlik medicinalıq qamsızlandırıw esabınan usı jıldıń ózinde 298 nawqasqa joqarı texnologiyalıq operaciyalar ótkerilip, emlenip shıqtı. Sonday-aq, usı jılı 14 túrdegi joqarı texnologiyalıq operaciyalar jolǵa qoyıldı.
– Oraydın rawajlanıwı, onıӊ materiallıq-texnikalıq bazasınıӊ bekkemleniwi hám barlıq bólimlerdiӊ zamanagóy medicinalıq ásbap-úskeneler menen támiyinleniwi, joqarı mamanlıqtaǵı ilimiy kadrlardı tayarlaw menen birgelikte ámelge asırılmaqta,-deydi M.Xaytbaev.
Oray qánigeleri xalıqaralıq ilimiy konferenciyalarda belsene qatnasıp, sırt elllerdiń jetekshi klinikalarında bilimin arttırıp kelmekte. 2023-jılı 10 qánige Rossiya, Qıtay hám Belorus mámleketlerinde, 2024-jılı 9 qánige Finliyandiya, Rossiya, Túrkiya ellerinde bilimin arttırdı. Oray menen Germaniya mámleketiniń «SES» joybarı arasında memorandumǵa qol qoyılǵan bolıp, hár jılı Germaniyadan jetekshi qánigeler kelip, Oray qánigeleri menen birgelikte nawqaslardı tekseriwden ótkerdi hám quramalı operaciyalardı ámelge asırdı. Usı kúnge shekem Germaniyadan xirurg, qan-tamır xirurgi, neyroxirurg, nevrolog, endoskopist, radiolog hám reanimatolog-anesteziolog shıpakerler keldi.
Oray shıpakerleri Tashkent qalasınıń jetekshi qánigeleri menen birgelikte tıǵız baylanısta jumıs alıp barmaqta. Telemedicinanıӊ rawajlanıwı da medicinanıӊ jaӊadan qolǵa kirgizgen jetiskenlikleriniӊ biri bolıp esaplanadı.
Media-tur dawamında qatnasıwshılar emlew orayındaǵı jaratılǵan sharayatlar menen tanısıp, ózlerin qızıqtırǵan sorawlarǵa juwap aldı.
Á.Jiyemuratov,
Qaraqalpaqstan xabar agentligi