Tashkent qalasında 2018-jıl 5-aprel kúni Qırǵızstan Respublikası basshılıǵında Shanxay birge islesiw Regionallıq terrorizmge qarsı strukturası (ShBSh RTQS) Keńesiniń otız ekinshi májilisi bolıp ótti. Oǵan Pakistan Islam Respublikası, Rossiya Federaciyası, Tájikstan Respublikası, Qıtay Xalıq Respublikası, Qırǵızstan Respublikası, Qazaqstan Respublikası, Hindstan Respublikası, Ózbekstan Respublikası hám ShBSh RTQS Atqarıw komiteti wákilleri qatnastı.

Májiliste ShBShǵa aǵza mámleketlerdiń 2019-2021-jıllarda terrorizmge, separatizmge hám ekstremizmge qarsı gúresiw boyınsha birge islesiw baǵdarlaması jáne ShBSh RTQS Keńesiniń ShBShǵa aǵza mámleketler basshıları Keńesine ShBSh RTQSnıń 2017-jılǵı jumısı haqqındaǵı esabınıń joybarları maqullandı.

ShBShǵa aǵza mámleketlerdiń 2016-2018-jıllarda terrorizmge, separatizmge hám ekstremizmge qarsı gúresiw boyınsha birge islesiw baǵdarlaması jáne ShBSh RTQS qararlarınıń 2017-jılda orınlanıwı, sonday-aq, ShBShǵa aǵza mámleketlerdegi wákillikli uyımlardıń ShBShǵa aǵza mámleketler aymaǵındaǵı erkinen ayırıw orınlarında jazanı ótep atırǵan shaxslardı terroristlik hám ekstremistlik shólkemlerge tartıwǵa qarsı gúresiw boyınsha birgeliktegi ilajlardı ámelge asırıwdıń barısı haqqındaǵı málimlemesi kórip shıǵıldı.

Terrorizm, separatizm hám ekstremizm maqsetlerinde Internet tarmaǵınan paydalanıwdı anıqlaw jáne oǵan shek qoyıw boyınsha ShBShǵa aǵza mámleketlerdegi wákillikli uyımlardıń «Syamin-2017» birgeliktegi terorizmge qarsı oqıw shınıǵıwınıń juwmaqları maqullandı. 2018-jılı ShBShǵa aǵza ellerdiń birgeliktegi shegara operaciyasın ótkeriw haqqında qarar qabıl etildi.

ShBShǵa aǵza mámleketlerge xalıqaralıq terroristlik shólkemler tárepinen dónip turǵan qáwipler dodalandı. ShBShǵa aǵza mámleketlerdiń wákillikli uyımları arasındaǵı birge islesiwdi bekkemlew boyınsha kelisimlerge erisildi.

Terrorizmge qarsı gúresiw tarawındaǵı xalıqaralıq birge islesiwdi bekkemlew maqsetinde ShBSh RTQS jáne BMSh Qáwipsizlik keńesi Terrorizmge qarsı gúresiw komitetiniń atqarıwshı direktorı hám BMSh Terrorizmge qarsı gúresiw basqarması menen óz-ara túsinisiw hám birge islesiw haqqındaǵı memorandumlardıń joybarları maqullandı.

2018-jıldıń tórtinshi shereginde ShBShǵa aǵza mámleketler hám ShBSh janındaǵı baqlawshı eller arasında xalıqaralıq terrorizmge hám ekstremizge qarsı gúresiw boyınsha birge islesiw máselesine baǵıshlanǵan altınshı ilimiy-ámeliy konferenciya ótkeriw haqqında qarar qabıl etildi.

ShBSh RTQS Atqarıw komitetiniń ótken dáwirdegi jumısına unamlı baha berdi.

ShBSh RTQS jumısın rawajlandırıw hám ShBShǵa aǵza mámleketlerdegi wákillikli uyımlardıń birge islesiwin bekkemlewge qosqan jeke úlesi ushın usı mámleketlerdegi wákillikli uyımlardıń bir qatar xızmetkerleri hám ShBSh RTQS Atqarıw komitetiniń juwaplı xızmetkerleri ShBSh RTQS Keńesiniń jarlıǵı hám estelik belgisi menen sıylıqlandı.

ShBSh RTQS Atqarıw komitetiniń jumısın shólkemlestiriwge, kadrlar hám qarjı jaǵınan támiyinlewge baylanıslı máseleler boyınsha qararlar qabıl etildi.

ShBSh RTQS Keńesiniń gezektegi májilisin 2018-jıl oktyabr ayında Qırǵızstan Respublikası aymaǵında ótkeriw haqqında kelisip alındı.

Keńes májlisi issheńlik, ámeliy hám doslıq ruwxında ótti.

ÓzA