Háptesine tek ǵana tórt dana alma jew júrek-qan tamır kesellikleri aqıbetinde ólim itimalın 40 procentke shekem azaytadı eken, Qıtaydıń Yanczi emlewxanası izertlewshileri usınday juwmaqqa keldi. Izertlew nátiyjeleri Frontiers in Nutrition jurnalında járiyalandı.

Uzaq jılılardı qamtıp alǵan tájiriybe-sınaqta xolesterin dárejesi joqarı 2 184 orta jastaǵı insan qatnastı. Ilimpazlar olardıń qalay awqatlanatuǵının úyrendi, ásirese, miywelerdi jewge ayrıqsha itibar qarattı, keyingi dawamlı baqlawlarda barlıq ólim jaǵdayları belgilep barıldı.
Nátiyjelerge bola, háptesine úsh-tórtewden alma jegenlerde ulıwma ólim qáwipi bul miyweni jemegenlerge qaraǵanda 39 procent az bolǵan. Sonday-aq, banan da salamatlıq ushın oǵada paydalı ekeni – bul tropikalıq miyweni turaqlı jeytuǵınlarda erte ólim qáwipi derlik 30 procentke azayǵan.
Kúna ara (háptesine úsh-tórt dana) alma jew júrek-qan tamır kesellikleri aqıbetinde ólim qáwipin 40 procentke azaytqan. Ilimpazlar júrekti bekkemlew ushın miywelerdi turaqlı jew kerek, demekte.

Qaraqalpaqstan xabar agentligi