Еkologiya, qorshaǵan ortalıqtı qorǵaw hám klimat ózgeriwi ministri Aziz Abduhakimov BAÁ Xalıqaralıq bioshorlanǵan awıl xojalıǵı orayınıń (ICBA) bas direktorı doktor Tarifa Al Zaabi menen ushırasıw ótkerdi.

Ushırasıwda Ózbekstan Respublikası Prezidenti Shavkat Mirziyoev tárepinen klimat konferenciyasında awıl xojalıǵı eginleriniń klimat ózgeriwine shıdamlılıǵın arttırıw ushın jetekshi strukturalardıń qatnasıwında Regionallıq genetikalıq resurslar bankin shólkemlestiriw boyınsha alǵa qoyılǵan baslama dodalandı.
ICBA baslamanı qollap-quwatlawǵa hám onı ámelge asırıwda belsene qatnasıwǵa tayar ekenligin bildirdi. Ministr bolsa bul struktura Oraylıq Aziya regionında sanaat kooperaciyası, sonday-aq, ilimiy-texnikalıq almasıw ushın áhmiyetli platformaǵa aylanıwı múmkin ekenligin atap ótti.
Ushırasıwda Nókis, Moynaq hám Shımbay fermerleriniń ázziligin azaytıw hám olardıń jer degradaciyasına baylanıslı ekonomikalıq shıǵınlardıń aldın alıwǵa beyimlesiwsheń potencialın arttırıwǵa qaratılǵan «Qaraqalpaqstannıń degradaciyaǵa ushıraǵan aymaqlarında turaqlı awıl xojalıǵı óndirislik sistemasın rawajlandırıw» joybarı dodalandı. Bul joybar Aral teńizi apatshılıǵınıń aqıbetlerin jumsartıw hám regionda turaqlı awıl xojalıǵın rawajlandırıwǵa qaratılǵan qádem ekeni atap ótildi.
Ushırasıw juwmaǵında 2025-jılı Ózbekstan hám ICBA arasındaǵı óz-ara birge islesiwdi kúsheytiw, atap aytqanda, «Qorshaǵan ortalıqtı qorǵaw hám «jasıl» ekonomika jılın»da birgeliktegi ilimiy joybarlardı shólkemlestiriw hám óz-ara paydalı nátiyjelerge erisiw ushın turaqlı másláhátlesiwler ótkeriw boyınsha kelisimge erisildi.

Muhayyo Toshqoraeva, ÓzA