Elimizde barlıq tarawlarda alıp barılıp atırǵan keń kólemli reformalar xalqımızdıń ómirinde hám kúndelikli turmısında óziniń ayqın kórinisin tappaqta. «Xalıq mámleketlik uyımlarǵa emes, al mámleketlik uyımlar xalqımızǵa xızmet etiwi kerek» degen ideya bul baǵdardaǵı jumıslardıń tiykarǵı ólshemine aylanıp, xalqımızdıń jámiyetlik belsendiligin, olardıń erteńgi kúnge isenimin arttırmaqta.
Húrmetli Prezidentimizdiń baslaması menen turmısqa engizilip atırǵan jańa sistema-«Abat awıl» baǵdarlaması sheńberinde biziń respublikamızda da keń kólemli jumıslar ámelge asırılmaqta. Atap aytqanda, Beruniy rayonınıń «Biybazar» awıl puqaralar jıyını, «Xorezm» hám «Palvash» mákan puqaralar jıyınları aymaqlarında júrgizilip atırǵan qurılıs hám abadanlastırıw jumısları bunıń ayqın mısalı bolıp tabıladı.
«Biybazar» awıl puqaralar jıyınınıń «Paxtashı» elatlı punkti rayonnıń eń shetinde jaylasqan bolıp, búgingi kúni bul jerde 223 shańaraq jasap kelmekte. Jasıratuǵını joq, sońǵı jılları awıl xalqınıń kúndelikli turmısında bir qatar mashqalalar toplanıp qalǵan edi. Ayırım turǵınlar turaq jaylarınıń janına ózbasımshalıq penen túrli kórinistegi, hesh qanday talap jáne normalarǵa juwap bermeytuǵın nızamsız qurılıslar qurıp alǵan. Ishki jollardıń jaǵdayı ashınarlı halatta.
Búgingi kúni elatlı punktte Ózbekstan Respublikası Prezidentiniń 2017-jıl 8-avgusttaǵı «Aymaqlardıń jedel sociallıq-ekonomikalıq rawajlanıwın támiyinlewge baylanıslı tiykarǵı ilajlar haqqında»ǵı qararına muwapıq shólkemlestirilgen sektorlar tárepinen aytarlıqtay jumıslar alıp barılmaqta. Elimiz basshısınıń baslaması menen baslanǵan iske bárshe jámleskenlik penen qatnaspaqta. Awıldı abadanlastırıw maqsetinde nızamsız qurılıslar alıp taslanıp, aymaqtaǵı 66 shańaraqtıń turaq jayınıń tóbesi hám fasadı, 157 shańaraqtıń fasadı ońlanıp, boyaw jumısları alıp barılmaqta. Sonday-aq, 4,7 kilometr uzınlıqtaǵı avtomobil hám ishki jolǵa qum-shaǵıl tas tóselip, 1,5 kilometr uzınlıqtaǵı joldı ońlaw, 26-sanlı ulıwma bilim beriw mektebi, 56-sanlı mektepke shekemgi bilimlendiriw mákemesiniń imaratlarında qayta ońlaw jumısları júrgizilmekte.
Baǵdarlama boyınsha qurılıs hám abadanlastırıw jumısları rayondaǵı «Xorezm» máhálle puqaralar jıyını aymaǵındaǵı Kat kóshesinde de alıp barılmaqta. Kóshedegi 9 kóp qabatlı turaq jaydıń átirapındaǵı nızamsız qurılıslar alıp taslandı. Turaq jaydıń tóbesi hám fasadı ońlanbaqta. Jayǵa kirer jerdegi esikler, podezdleri qayta ońlanıp, elektr shıraqları ornatılmaqta. Balalar sport maydanshası, túngi jaqtılandırıw shıraqları, avtomobil jolları qurılmaqta. Piyadalar júretuǵın jollarǵa beton qaplamaları jatqarılmaqta.
«Palvash» mákan puqaralar jıyını aymaǵındaǵı 52-sanlı ulıwma bilim beriw mektebiniń imaratı, usı mektepke baratuǵın 1,5 kilometr uzınlıqtaǵı asfalt jol, 700 metr uzınlıqtaǵı piyadalar júretuǵın joldıń qurılısı pitkerilip, átirapın abadanlastırıw jumısları alıp barılmaqta. Bunday qayırlı islerge mákan puqaralar jıyınınıń turǵınları da belsene qatnaspaqta. Aymaqtaǵı fermer xojalıqları bul jumıslarǵa qatnasıp atırǵanlardı ıssı awqat penen támiyinlep, qayırlı islerge ózleriniń úleslerin qosıp kelmekte.
-Haqıyqatında da, kóp jıllardan beri toplanıp qalǵan mashqalalar Prezidentimiz baslaması menen ámelge asırılıp atırǵan baǵdarlama sheńberinde óziniń unamlı sheshimin tappaqta,-deydi «Xorezm» mákan puqaralar jıyınınıń baslıǵı Baxtiyar Abdullaev.- Bir neshshe millet wákilleri bir shańaraq aǵzalarınday awızbirshilikte jasap hám miynet etip kiyatırǵan awıl turǵınları bunday sawap islerden oǵada minnetdar.
Juwmaqlap aytqanda, «Abat awıl» baǵdarlaması sheńberinde alıp burılıp atırǵan keń kólemli jumıslar xalqımızdı miyrim-shápáát, bir-birewge húrmet jáne jámleskenlikke shaqırıp, awıllarımızdıń ele de kórkem, xalqımız turmısınıń abadan, perzentlerimizdiń baxıtlı keleshegine xızmet etiwi menen áhmiyetli.
D.ABIBULLAEV,
Qaraqalpaqstan xabar agentliginiń xabarshısı.