Usı jıl 29-mart kúni Taxtakópir rayonındaǵı Awıl-xojalıǵı kásip-óner kolledjinde rayon hákiminiń qararına muwapıq, jumıs orınların shólkemlestiriw hám xalıqtıń bántligin támiyinlew maqsetinde bos jumıs orınları miynet yarmarkası ótkerildi.

Oǵan rayon aymaǵındaǵı 21 mákeme hám kárxana túrli qánigelikler boyınsha 108 jumıs ornı menen qatnastı.

Ilajda Ózbekstan Respublikası Oliy Majlisi Nızamshılıq palatasınıń deputatı Z.Xaniyazov, rayon prokurorı Q.Bekmuratov, IIB baslıǵı Ó.Turdıbaev hám basqalar shıǵıp sóylep, usı miynet yarmarkasına qatnasıp atırǵan waqtınsha jumıssız puqaralardı, ásirese, jaslardı óz qánigelikleri boyınsha jumısqa ornalasıp belgili bir kásip iyesi bolıwına tilegin bildirdi.

Rayon boyınsha usı jıl dawamında 6 márte usınday miynet yarmarkasın ótkeriw rejelestirilgen bolıp, bul yarmarka ekinshisi bolıp esaplanadı. Sonday-aq, bul yarmarkaǵa rayondaǵı 144 fermerlik xojalıǵı awıl-xojalıǵı jumıslarınıń baslanıwına baylanıslı máwsimli jumıs orınları ushın bos jumıs orınları menen qatnastı.

– Men 1976-jılı tuwılǵanman. Orta mektepti pikergenli berli úy biykesi bolıp, usı waqıtqa shekem jumıssız edim. Búgingi yarmarkada rayondaǵı 6-sanlı ulıwma bilim beriw mektebine jumısqa ornalastım,-deydi S.Qalbaeva.

Yarmarkada ulıwma 80 jumıssız puqara qatnasıp, sonnan 23 puqaranıń jumıs penen bántligi támiyinlendi.

Qaraqalpaqstan xabar agentligi.