Paytaxtımızda eki kún dawamında stomatologiyanıń áhmiyetli máselelerine baǵıshlanǵan respublikalıq konferenciya bolıp ótti. Oǵan Tashkent qalası, Ándijan, Buxara wálayatı hám respublikamızdıń qala hám rayonlarınan kelgen taraw basshıları hám qánigeleri qatnastı.
Ilajdıń birinshi kúninde Berdaq atındaǵı Qaraqalpaq mámleketlik akademiyalıq muzıkalı teatrında jalpı májilis ótkerildi.
Onı Qaraqalpaqstan Respublikası Densawlıqtı saqlaw ministri D.Xodjiev alıp bardı.
Ilajda Ózbekstan Respublikası stomatologlar associaciyasınıń baslıǵı A.Xasanov, Tashkent mámleketlik stomatologiya institutı rektorı, professor J.Rizaev, usı institut professorları M.Azimov, L.Xasanova hám basqalar shıǵıp sóylep, tarawda ámelge asırılıp atırǵan jumıslar hám aldaǵı rejeler tuwralı keń túrde maǵlıwmat berdi.
Konferenciya qatnasıwshıları balalarda ushırasatuǵın odontogenli osteomielit kesselliginiń házirgi medicinadaǵı emlew usılları hám diagnostikasındaǵı kemshilikleri, Tashkent qalasında ótkerilgen «Ómir dawamında kózdi qamastıratuǵın kúle shıray» baǵdarlamasın ámelge asırıwda toplanǵan tájiriybeleri, awız boslıǵı silekey qabatında ushırasatuǵın keselliklerdi kompleksli emlewdiń zamanagóy usılları hám basqa da tarawda erisilgen jańalıqlar, tájiriybeler menen tanıstı.
Ilajda belsendiligi menen kózge túsip kiyatırǵan bir qatar taraw xızmetkerlerine Ózbekstan Stomatologlar associaciyasınıń kókirek belgisi, Húrmet jarlıqları tapsırıldı.
Soń Konferenciya qatnasıwshıları sekciyalarǵa bólinip májilis ótkerdi. Onda stomatologiyada engizilgen jańa texnologiyalar menen tanısıp, tarawǵa baylanıslı bir qatar máseleler boyınsha pikir alısıwlar, tájiriybe almasıwlar ámelge asırıldı.
Ilajdıń ekinshi kúni respublikalıq klinikalıq emlewxanada, stomatologiyalıq poliklinikada master klass ótkerildi. Onda qánigeler tereń medicinalıq tekseriwden ótkeriwdiń, zamanagóy usıl, material hám ásbaplardı qollaw menen tislerdi tiklewdiń sırları, implantaciya tiykarları tuwralı maǵlıwmatlar berip, tájiriybe almastı.
Ilaj qatnasıwshıları kórkem óner sheberleriniń atqarıwındaǵı koncert baǵdarlamasın tamashalap, paytaxtımızdaǵı I.Savickiy atındaǵı Qaraqalpaq mámleketlik kórkem óner muzeyine sayaxat etti.
Ótkerilgen ilajda Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev qatnastı.
Á.Jiemuratov,
Qaraqalpaqstan xabar agentliginiń xabarshısı.
(M.Habibullaevtıń túsirgen súwretleri).