29-mart kúni Xalıq deputatları Taxtakópir rayonlıq Keńesiniń XXXV sessiyası bolıp ótti.

Sessiya jumısına Ózbekstan Respublikası Oliy Majlisi Nızamshılıq palatası Spikeriniń orınbasarı S.Otamuratov, Nızamshılıq palatasınıń deputatları, Ózbekstan Respublikası Ministrler Kabinetiniń juwaplı xızmetkeri A.Ǵaniev, sonday-aq, Qaraqalpaqstan Respublikası Joqarǵı Keńesiniń deputatları, respublikamızdaǵı ministrlikler menen vedomostvolardıń wákilleri, rayon hákiminiń orınbasarları, rayon aymaǵındaǵı kárxana, shólkemler, huqıq qorǵaw hám puqaralardıń ózin-ózi basqarıw uyımları baslıqları, ǵalaba xabar qurallarınıń wákilleri qatnastı.

Sessiyanı rayon hákimi J.Adilov alıp bardı.

Sessiyada Ózbekstan Respublikası Oliy Majlisi Nızamshılıq palatası deputatları tárepinen Taxtakópir rayonında aymaqlardı sociallıq-ekonomikalıq rawajlandırıw, ekonomika tarmaqların hám sociallıq tarawdıń jaǵdayların úyreniw, bar mashqalalardı sheshiwde əmeliy járdem kórsetiw, puqaralardıń huqıqları menen erkinliklerin təmiyinlewge baylanıslı máselelerdi úyreniw nətiyjeleri kórip shıǵıldı.

Kún tərtibindegi məsele boyınsha Ózbekstan Respublikası Oliy Majlisi Nızamshılıq palatasınıń deputatı Z.Xaniyazov shıǵıp sóylep, usı jıldıń 23-mart kúninen berli Oliy Majlis Nızamshılıq palatası deputatları, Ózbekstan Respublikası Ministrler Kabineti, ministrlikler hám mákemelerdiń wákillerinen ibarat topar tárepinen Taxtakópir rayonınıń sociallıq-ekonomikalıq rawajlanıw jaǵdayı úyrenilgeni tuwralı keń túrde maǵlıwmat berdi.

Jumısshı topar tárepinen shólkemlestirilgen hár bir sektor orınlarǵa shıǵıp, aymaqtaǵı xojalıqlarǵa úyme-úy kirip puqaralardıń múrájatları tıńlanǵan hám olardıń belgili bir bólegi óz ornında sheshilgen, al ayırımlarınıń sheshimi boyınsha ilajlar belgilengen.

Sektorlardıń jumısı talqılanǵanda, puqaralar tárepinen 958 mashqalalı máseleler aytılǵan. Sonıń 489 ı (derlik 51 procenti) jumıs penen támiyinlew máselesine baylanıslı bolıp, olardıń 149 ı (30% i) jumısqa ornalastırılǵan. Múrájatlardıń 37 si «Jol kartası»na kirgizilgen.

Rayonda 2017-jıl dawamında 112 investiciyalıq joybardıń ámelge asırılıwı nátiyjesinde 543 jańa jumıs orınları jaratılǵan. Ótken jılda subvenciya muǵdarı 44 procentti quraǵan, bıyılǵı jılı bul kórsetkishti 30 procentke shekem azaytıw rejelestirilgen.

Bayanatshı óz sózinde bilimlendiriw, komunallıq xızmet, medicina, jınayatshılıq hám huqıqbuzarlıq tarawındaǵı ámelge asırılǵan jumıslar, jetiskenlikler tuwralı keń túrde maǵlıwmat berip, anıqlanǵan kemshiliklerge toqtap ótti.

Atap aytqanda, bir qatar mekteplerde rus, inglis tili, informatika páni boyınsha kadrlardıń, qaraqalpaq tilindegi kórkem ádebiyatlardıń jetispeytuǵınlıǵı anıqlanǵan. Úsh mektepte sport zal joq. 10 mektep iri ońlawǵa, 5 mektep rekonstrukciyaǵa mútáj. 4 mektepte kompyuter úskeneleri ulıwma joq. Úyreniw barısında 5 orında mektepke shekemgi bilimlendiriw mákemesine mútájlik anıqlanǵan.

Jumısshı topar tárepinen xalıqqa kórsetilip atırǵan medicinalıq xızmet tereń talqılanıp, bul tarawdı kadrlar jetispewshiligi (26,75 stavka vakant) máselesi qıynap atırǵanlıǵı anıqlanǵan. Oraylıq emlewxana taza ishimlik suwı menen támiyinlenbegen. Ásbap-úskeneler menen támiyinleniwinde de bir qatar kemshilikler bar. Rayondaǵı ayırım medicinalıq mákemeler iri ońlawǵa, rekonstrukciyalawǵa mútáj.

Sessiyada atap ótilgen kemshilikler boyınsha, rayon hákimi J.Adilov, rayonlıq medicina birlespesiniń baslıǵı Í.Palwanov, qarjı bóliminiń baslıǵı Z.Tajimuratov, puqaralardıń ózin-ózi basqarıw uyımları jumısların muwapıqlastırıw boyınsha Taxtakópir rayonlıq Keńesi baslıǵınıń birinshi orınbasarı E.Begmanov hám basqalar shıǵıp sóylep, atap ótilgen kemshiliklerdi saplastırıw, rayondı sociallıq-ekonomikalıq rawajlandırıw baǵdarındaǵı rejeleri menen tanıstırdı. Deputatlar tárepinen berilgen sorawlarǵa juwap berildi.

Soń Ózbekstan Respublikası Oliy Majlisi Nızamshılıq palatası Spikeriniń orınbasarı S.Otamuratov shıǵıp sóylep, Ózbekstan Respublikası Oliy Majlisi Nızamshılıq palatası deputatları tárepinen úyreniw nətiyjesinde atap ótilgen kemshiliklerdi saplastırıw boyınsha pikir-usınısların bildirdi.

Sessiya kún tártibindegi kórilgen máseleler boyınsha tiyisli qarar qabıl etti.

Sessiyaǵa Qaraqalpaqstan Respublikası Joqarǵı Kenesi Baslıǵınıń orınbasarı A.Hamraev qatnastı hám shıǵıp sóyledi.

Á.Jiemuratov,

Qaraqalpaqstan xabar agentliginiń xabarshısı.