Ózbekstan Respublikası Prezidenti Shavkat Mirziyoev orınlarda ámelge asırılıp atırǵan dóretiwshilik jumıslar, alıp barılıp atırǵan izbe-iz reformalar, iri joybarlar menen tanısıw hám xalıq penen pikirlesiw maqsetinde 30-mart kúni Jizzaq wálayatına bardı.
Jizzaq wálayatı áyyemnen shıǵıs penen batıstı baylanıstıratuǵın Ullı jipek jolınıń áhmiyetli ótiw punktlerinen biri bolıp kelgen. Ǵárezsizlik jıllarında aymaqtıń elimizdi rawajlandırıwdaǵı ornı hám áhmiyeti jáne de arttı. Elimizde ámelge asırılıp atırǵan keń kólemli reformalardıń nátiyjesinde aymaqtıń qolay geografiyalıq hám transport-kommunikaciyalıq imkaniyatlarınan, jer astı hám jer ústi baylıqlarınan, úlken ekonomikalıq potencialınan nátiyjeli paydalanılmaqta.
Prezidentimiz ótken jılı 28-aprel kúni wálayatqa sapar etiwi waqtında sociallıq-ekonomikalıq rawajlanıw procesi menen tanısqan, xalıqtıń abadanlıǵı, jańa jumıs orınların jaratıw boyınsha juwapker adamlarǵa tiyisli tapsırmalar bergen edi. Ótken waqıt ishinde wálayatta úlken jumıslar ámelge asırıldı.
Mámleketimiz basshısı irge tasın qalap bergen Zafarabad rayonındaǵı neftti qayta islew zavodınıń qurılısı tek ǵana elimizde emes, al Oraylıq Aziya regionında úlken waqıya boldı. Házirgi waqıtta joybardıń nırqı 2,2 milliard AQSh dollar bolǵan kárxananı qurıw jumısları joqarı pátlerde dawam etpekte. «Jizzaq» erkin ekonomikalıq zonasında shet el investiciyalarınıń qatnasında qurılıp atırǵan «Uzbekistan Peugeot Citroen Automotive» zavodı jaqında iske túsirilgen shiyshe ónimlerin islep shıǵaratuǵın «Ming Yuan Sily industry» juwapkershiligi sheklengen jámiyet túrindegi kárxana, Jizzaq qalasında qurılıp atırǵan «SILK EXPERT processing» jipek jetistiriwge hám qayta islewge qánigelesken Ózbekstan – Ullı Britaniya qospa kárxanası elimiz ekonomikasınıń arttırıwına xızmet etedi.
Aymaqlardı kompleksli rawajlandırıwǵa qaratılıp atırǵan itibardıń nátiyjesinde bunday iri joybarlar alıs rayonlarda da ámelge asırılmaqta. Sonıń ishinde, Forish rayonınıń Egizbuloq awılında Ullı Britaniyanıń «Leigh Barrier LLP» kompaniyası menen birgelikte «Mega invest industrial» JShJ tárizindegi kompozit armaturalar islep shıǵıw zavodı, Ǵállearal rayonındaǵı «Marjon global» shıpalı ósimliklerdi qayta islew, Zamin rayonında «Zamin-Farm» erkin ekonomikalıq zonası quramındaǵı kárxanalar wálayattıń ekonomikasın rawajlandırıwda, xalıqtıń bántligin támiyinlewde úlken áhmiyetke iye bolmaqta.
Prezidentimiz bul gezektegi saparı dawamında wálayattı bunnan bılay da rawajlandırıwǵa qaratılǵan bir qatar joybarlardıń ámelge asırılıwı, burınǵı sapar etiw dawamında berilgen tapsırmalardıń orınlanıwı, xalıqtıń talap-zárúrlikleri menen tanıstı.
Mámleketimiz basshısı dáslep Zarbdar rayonındaǵı «Zarbdor textile» juwapkershiligi sheklengen jámiyetinde boldı. Usı jıldıń aprel ayında iske túsiriliwi rejelestirilgen kárxanada 17,5 million dollarlıq qurılıs-montajlaw jumısları islengen.
Kárxanada jılına 31 million kvadrat metr gezleme jáne 6,5 million dana trikotaj ónimleri islep shıǵarıladı. Kárxana óz jumısın baslawı menen 864 jumıs ornı jaratıladı. Óndiristi keńeytiwdiń esabınan usı jıldıń úshinshi shereginde jáne 196 hayal-qız jumıs penen támiyinlenedi.
Shavkat Mirziyoev elimizde jetistirilip atırǵan paxta ózimizde tolıq qayta isleniwi qosımsha qunlı ónim tayarlaw menen birge, jańa jumıs orınların jaratıw imkaniyatın beretuǵının atap ótti.
Bul jerde Jizzaq qalasındaǵı burınǵı toqımashılıq kombinatınıń bos turǵan imaratları tiykarında zamanagóy toqımashılıq kompleksin jaratıw, «Jizzaq», «Zamin-farm» erkin ekonomikalıq zonalarında 2018-2019-jıllar ushın rejelestirilgen innovaciyalıq, sonday-aq, wálayatta jeńil sanaat hám awıl xojalıǵı tarawlarında ámelge asırılatuǵın joybarlardı tanıstırıw máresimi de ótkerildi.
Bunnan soń mámleketimiz basshısı Jizzaq qalalıq Ishki isler bólimi 2-sanlı ishki isler bólimshesinde boldı.
Elimizde qáwipsizlikti hám turaqlılıqtı bekkemlew, jámiyetlik tártipti, xalıqtıń tınısh-tatıwlıǵın támiyinlewge ayrıqsha itibar qaratılmaqta. Onı profilaktika, operativ-izlew, tergew, jol háreketi qáwipsizligi, órt qáwipsizligi, qorǵaw, patrul-post xızmetleri, mobilizaciyalıq otryadlar qayta shólkemlestirilip, ishki isler uyımlarınıń materiallıq-texnikalıq bazası turaqlı bekkemlenip atırǵanında da kóriw múmkin.
Prezidentimiz 2017-jıl 17-avgust kúni ishki isler uyımları xızmetkerleri menen ótkerilgen videoselektor májilisinde Jizzaq qalasında «Qáwipsiz qala» joybarın engiziw boyınsha tapsırma bergen edi. Bul tapsırmanıń orınlanıwı boyınsha Jizzaq qalalıq ishki isler bólimi 2-sanlı ishki isler bólimshesinde «Qáwipsiz qala» basqarmasınıń situaciyalıq orayı shólkemlestirildi. Oray jol háreketi qáwipsizligi, órt qáwipsizligi, qorǵaw xızmeti, patrul-post xızmeti hám basqa da tarmaqlardı geoinformaciyalıq sistema arqalı basqaradı. Bazarlar, bilimlendiriw hám medicina mákemeleri, miymanxanalar, jollar hám basqa da jámiyetlik orınlarǵa ornatılǵan videobaqlaw úskeneleri, zamanagóy signal jetkerip beriw texnikası bunda payda beredi. Bul jınayat hám huqıqbuzarlıq júz beriwiniń aldın alıwda, olardı tez múddette ashıwda úlken áhmiiyetke iye.
– Bunday videobaqlaw qurılmasın qaladaǵı profilaktika inspektorlarınıń bólmesine, mektepke shekemgi bilimlendiriw mákemeleriniń hám mekteplerdiń átirapına da ornatıw kerek, – dedi Prezident. – Sonda oqıtıwshılar menen oqıwshılarda da juwapkershilik jáne de artadı.
Bólimshe eki qabatlı imarattta jaylasqan bolıp, bul jerde «Zargarlik» mákan puqaralar jıyını, máhálle saqshısı, profilaktika inspektorınıń bólmeleri orın alǵan.
Shavkat Mirziyoev máhálle baslıǵı hám profilaktika inspektorı menen xalıqtıń abadanlıǵın arttırıw, kem támiyinlengen shańaraqlardı qollap-quwatlaw, máhállede jınayatshılıqtıń aldın alıw máselesinde sáwbetlesti.
Mámleketimiz basshısına ishki isler bólimshesi tárepinen islep shıǵılǵan mobil baǵdarlama haqqında maǵlıwmat berildi. . «Jizzax IIB» mobil baǵdarlaması xalıq ushın biypul bolıp, puqaralardıń mobil telefonına júklenedi. Bul baǵdarlama arqalı puqaralar izlewde bolǵan hám biydárek joǵalǵan shaxslar haqqında tolıq maǵlıwmatqa iye bolıwı, profilaktika inspektorınıń jumısına baylanıslı maǵlıwmatlardı alıwı múmkin.
Xızmetkerlerge jedel málimleme jetkeriw maqsetinde wálayattaǵı uyalı baylanıs kompaniyası menen birgelikte 2 mıńnan aslam telefon nomeri tarqatılǵan. Bul qolaylıq arqalı jedel málimleme jetkeriw imkaniyatı jaratılmaqta. Yaǵnıy, náwbetshilik bóliminde bar planshet arqalı kúndelikli júz bergen jınayatlar, jol transport hádiyseleri, esletpe hám jańalıqlar xızmetkerlerge jedellik penen jetkeriledi.
Mámleketimiz basshısı tiyisli juwapker adamlarǵa bul sistemanı bunnan bılay da jetilistiriw boyınsha tapsırmalar hám kórsetpeler berdi.
Usı jerde Prezidentimiz bir topar nuraniyler menen ushırastı, shın júrekten hám ashıq-aydın ruwxta ótken sáwbetlesiwde elimizge hám xalıqaralıq áhmiyetke iye bolǵan máseleler tuwralı sóz etildi.
Keyingi mánzil Jizzaq qalası Mustaqillik kóshesinde qurılıp atırǵan kóp qabatlı arzanlatılǵan turaq jaylar boldı.
Prezidentimizdiń 2016-jıl 22-noyabrdegi «2017-2020-jıllarda qalalarda arzan kóp kvartiralı jaylardı qurıw hám rekonstrukciyalaw baǵdarlamasın ámelge asırıw ilajları haqqında»ǵı qararınıń orınlanıwı boyınsha bul turaq jaylar xalıqtıń keń qatlamı ushın zamanagóy jaylardan paydalanıw dárejesin túp-tiykarınan arttırıw, jer resurslarınan aqılǵa uǵras paydalanıwdı támiyinlewge xızmet etpekte. Bunday zamanagóy jaylar elimizdiń shırayına-shıray qosıw hám xalıqtıń turmıs abadanlıǵın arttırıw menen birge, adamlarda mámleketke, ertengi kúnge isenim sezimin jáne de bekkemlemekte.
Jizzaq qalasında qurılıp atırǵan turaq jaylardı usı jıl sentyabr ayında tolıq paydalanıwǵa tapsırıw názerde tutılǵan. 7 qabatlı, 420 kvartiraǵa mólsherlengen jaylar 2 hám 3 bólmeli. Qalanıń shırayına-shıray qosıp atırǵan bul 10 jay turaq jayǵa mútáj xalıqtı basqıshpa-basqısh zamanagóy jaylar menen támiyinlew imkaniyatın beredi.
Prezidentimiz jańadan qurılıp atırǵan turaq jaylardıń joybarı menen tanıstı.
Usı jerde wálayatta alıp barılıp atırǵan qurılıs jumısları haqqında tolıq maǵlıwmat berildi. Sharap Rashidov rayonındaǵı Uchtepa qalashasında kóp qabatlı turaq jay imaratlarınıń jaylasıw joybarı, bul rayondaǵı «Toqchilik» APJ aymaǵında qurılıp atırǵan zamanagóy 3-4 qabatlı arzanlatılǵan turaq jay massiviniń joybarlarında xalıqtıń mútájligi esapqa alınǵan bolıp, qurılıs jumısları basqıshpa-basqısh ámelge asırıladı.
Bunnan tısqarı, Jizzaq qalasındaǵı Islam Kárimov kóshesi boylap qurılatuǵın infrastrukturalıq obektler, kóp qabatlı turaq jaylar, Sayljoyi máhállesi aymaǵındaǵı 37-sanlı mektepke shekemgi bilimlendiriw mákemesiniń imaratın qayta ońlaw sıyaqlı bir qatar perspektivalı joybarlar usınıldı.
-Jizzaq qalasında keń kólemli qurılıs jumısları alıp barılmaqta. Sonıń ushın bul jerde qurılıs materialların islep shıǵarıw kárxanaların shólkemlestiriw kerek, – dedi mámleketimiz basshısı. – Áne sonda qurılıp atırǵan imaratlardıń bahası arzanǵa túsedi.
Prezidentimiz wálayatta ishimlik suw sistemasın rawajlandırıw joybarına ayrıqsha itibar qaratıw zárúrligin atap ótti. Xalıqtı taza ishimlik suw menen támiyinlew boyınsha barlıq dáreklerdi iske qosıw ushın juwapker adamlarǵa kórsetpeler berdi.
Jizzaq wálayatı kóp qabatlı turaq jay fondın támiyinlew baǵdarlamasına tiykarlanıp, 2017-jılı 345 kóp qabatlı turaq jay ońlanǵan. Bul jumıslardı ámelge asırıwda kommerciyalıq bankler tárepinen 16,3 milliard sum muǵdarında jeńillikli kreditler ajıratılǵan. 2018-jılı 409 kóp qabatlı turaq jay hám olardıń átirapın abadanlastırıw názerde tutılǵan. Bul maqsetlerge 59,6 milliard sum qarjı tartıladı.
Shavkat Mirziyoev joybarlar menen tolıq tanıstı. Juwapkerlerge ajıratılatuǵın qarjılardı, qurılıs jumısların juwmaqlaw múddetin qadaǵalawdı tapsırdı.
Prezidentimiz Doslıq rayonındaǵı Manas awılına bardı.
«Manas» awıl puqaralar jıyınında Jizzaq wálayatında awıl xojalıǵı tarmaqların rawajlandırıwǵa qaratılǵan joybarlar menen tanıstırıw máresimi ótkerildi.
Mámleketimiz basshısı terini qayta islew, agrosanaat kompleksi hám azıq-awqat klasterin qurıw, túye súti menen emleytuǵın klinika shólkemlestiriw baǵdarındaǵı usınıslarǵa ayrıqsha itibar qarattı. Xalıqtıń qıytaq jer xojalıqlarınan nátiyjeli paydalanıwına kómeklesiw, fermer hám diyqan xojalıqlarına buxgalteriyalıq esap júrgiziw boyınsha konsalting xızmetin kórsetiw, qarjılandırıw bazasın keńeytiw boyınsha kórsetpeler berildi.
«Abat awıl» baǵdarlamasınıń ámelge asırılıwı alıs aymaqlarda jasap atırǵan millionlaǵan jerleslerimizdiń turmısın jaqsılawǵa, olarǵa múnásip turmıs tárizin jaratıwǵa qaratılǵan áhmiyetli wazıypa ekeni atap ótildi. Manas awılı elimizde baslanǵan «Abat awıl» baǵdarlamasın engiziwde úlgi sıpatında tariyxta qaldı.
Ótken ásirdiń 60-jıllarında wálayattıń eń alıs aymaǵında qurılǵan Manas awılında búgingi kúnde 6,5 mıńnan aslam xalıq jasaydı. Sońǵı jılları infrastrukturalıq obektler, kóshe hám jollar, ishimlik suwı, ıssılıq, elektr energiyası támiynatı, mádeniy-turmıslıq xızmet kórsetiw talapqa juwap bermewi nátiyjesinde adamlar biraz qıynalıp atırǵan edi.
«Abat awıl» baǵdarlaması tiykarında bul jerde júzege kelgen mashqalalardı saplastırıw boyınsha qısqa múddette keń kólemli jumıslar ámelge asırıldı. Baǵdarlama sheńberinde izey suwlar qáddiniń kóteriliwin saplastırıw ushın 41 kilometr uzınlıqtaǵı kollektor-drenaj tarmaqları tazalandı. Eki qabatlı 34 jaydıń tóbesi qayta jabıldı. Turaq jaylardıń átirapındaǵı rejesiz qurılıslardıń ornında jańadan járdemshi imaratlar, tandırxanalar qurıldı. Miyweli hám 10 mıń túpten aslam sayamanlı terek nálleri otırǵızıldı.
Xalıqtı ishimlik suw menen támiyinlew maqsetinde «Suwaqaba» mámleketlik unitar kárxanası jámááti tárepinen 6,5 kilometrlik suw qubırı tartıldı. Suw tarqatıw obektleri ońlawdan shıǵarıldı. 2 ulıwma bilim beriw mektebi ońlanıp, qayta úskenelendi. Bul mekteplerde oqıw-óndirislik ustaxanalar qurılıp, aǵash ustashılıq, zergerlik, tigiwshilik ásbap-úskeneleri menen támiyinlendi. 17 balalar maydanshası, 2 mini futbol maydanshası, 250 orınlıq stadion qurıldı.
«Abat awıl» baǵdarlamasın ámelge asırıw baslanǵannan berli awılda 200 den aslam hayal-qızdıń bántligi támiyinlendi. Sonıń ishinde, «Jizzaqpaxtasanaat» akcionerlik jámiyetiniń 100 orınlıq, «Zaminteks» juwapkershiligi sheklengen jámiyetiniń 20 orınlıq tigiwshilik cexları qurılıp, awıl hayal-qızlarınan 120 sı jumısqa ornalastırıldı.
30 ıssıxana, kóp qabatlı jaylarda jasaytuǵın puqaralardıń malların baǵıw ushın 100 basqa mólsherlengen zamanagóy ferma qurıldı. Veterinariya xızmeti iske túsirildi. Zamanagóy kórinistegi 31 sawda dúkanı, nanbayxana, monsha qurıldı. 500 orınlıq «Manas» mádeniyat sarayı tolıq ońlawdan shıǵarılıp, mádeniy-aǵartıwshılıq orayına aylandırıldı. Awıllıq shıpakerlik punkti qayta rekonstrukciyalanıp, onıń ornında 500 adamnıń kóriniwine mólsherlengen shańaraqlıq poliklinika shólkemlestirildi.
Prezidentimiz bul poliklinikadaǵı sharayatlardı kózden ótkerdi.
– Orınlarda zamanagóy medicina mákemelerin qurıp atırǵanımız jaqsı, álbette. Endigi talap usı mákemelerdi maman qánigeler menen támiynlew jáne xalıqqa kórsetilip atırǵan medicinalıq xızmettiń sapasın arttırıwdan ibarat bolıwı kerek, – dedi mámleketimiz basshısı.
Shavkat Mirziyoev awılda «Ózdanmahsulot» akcionerlik kompaniyasınıń baslaması menen qurılǵan nanbayxananı barıp kórdi. Zamanagóy texnologiyalar menen úskenelengen nanbayxanada kúnine 30 túrdegi 2 mıń dana qálipli nan tayarlanadı.
Mámleketimiz basshısı awıldaǵı 125 orınlıq «Aychurek» mektepke shekemgi bilimlendiriw mákemesinde de boldı. Qubla Koreya standartı tiykarında qurılǵan hám úskenelengen mákemede balalardıń aldınǵı shet el tájiriybeleri tiykarında dáslepki bilim-kónlikpelerin qáliplestiriw ushın barlıq qolaylıqlar jaratılǵan.
«Manas» mádeniyat sarayında xalıq deputatları Jizzaq wálayatlıq Keńesiniń gezeksiz sessiyası bolıp ótti.
Sessiyada Ózbekstan Respublikası Prezidenti Shavkat Mirziyoev shıǵıp sóyledi.
Tiyisli ministrlikler hám vedomstvolardıń basshıları, wálayat hám rayon hákimleriniń qatnasıwında ótken májiliste rayonlar menen videnokonferenciya arqalı sóylesilip, xalıqtı oylandırıp atırǵan máselelerge sheshim tabıldı.
Jańa sanaat kárxanaların shólkemlestiriw, awıl xojalıǵı reformaların dawam ettiriw boyınsha áhmiyetli wazıypalar belgilep berildi. Paxta maydanın qısqartıwdıń esabınan miywe-ovosh jetistiriwdi rawajlandırıw, ónimdi saqlaw hám qayta islewge mólsherlengen kárxanalar shólkemlestiriw, eksportqa qolaylı eginlerdi egiw, taw aldı aymaqlarda dárilik ósimlikler jetistiriw, sharwashılıqtı rawajlandırıw, xalıqtı taza ishimlik suwı menen támiyinlew boyınsha anıq ilajlar belgilendi.
Sessiyada shólkemlestiriw máselesi qaraldı.
Ózbekstan Respublikası Prezidenti Shavıkat Mirziyoevtiń usınısına bola Jizzaq wálayatı hákimi wazıypasın atqarıwshı lawazımında islep kiyatırǵan Ergash Soliev Jizzaq wálayatınıń hákimi etip tayınlandı.
Prezident Shavkat Mirziyoevtiń Jizzaq wálayatına saparı dawam etpekte.
Ábu Bákir ORAZOV,
Matnazar ELMURATOV,
Umar ASRAROV,
ÓzA nıń arnawlı xabarshıları