Paytaxtımızdaǵı Oraylıq maydanda Nókis garnizonındaǵı áskeriy bólimlerdiń 2017-jılǵı shaqırıwdaǵı 800 ge shamalas múddetli áskerleriniń ant beriw máresimi bolıp ótti.
Oǵan Qaraqalpaqstan Respublikası Joqarǵı Keńesi hám Ministrler Keńesiniń basshıları, Arqa-Batıs áskeriy okruginiń, Nókis qalası hakimliginiń, áskeriy bólimlerdiń basshıları, huqıq qorǵaw uyımlarınıń, jámiyetlik shólkemlerdiń wákilleri, áskerlerdiń ata-anaları hám tuwǵan-tuwısqanları qatnastı.
Ilajda Qaraqalpaqstan Respublikası Joqarǵı Keńesiniń Baslıǵı, Qaraqalpaqstan Respublikası Áskeriy-adminstrativlik sektorınıń basshısı M.Erniyazov shıǵıp sóylep, jıynalǵanlardı búgingi kúnde elimiz boylap keń túrde belgilenip atırǵan Nawrız bayramı jáne áskerlerdiń Ana-Watanımızdı qorǵawday oǵada maqtanıshlı hám iygilikli iske bel baylap, áskeriy ant qabıl etiwi menen qızǵın qutlıqladı.
Shıǵıp sóylewshilerdiń atap ótkenindey, búgingi kúni milliy armiyamız óziniń materiallıq-texnikalıq jaqtan bekkemligi, áskeriy xızmetkerlerdiń jawıngerlik tayarlıǵı, operativligi, házirgi zaman talabına juwap beretuǵınlıǵı menen rawajlanǵan ellerdiń zamanagóy armiyalarına teńlesiw dárejesinde. Armiyamızdaǵı áskerlerimiz óziniń oy-órisi hám fizikalıq tayarlıǵı, bilimi, zamanagóy texnika quralların puqta ózlestiriwi menen ajıralıp turmaqta.
Armiyamız xalqımızdıń tınısh-tatıw turmısı hám ar-namısı ushın janın pidá etiwge tayar bolǵan jaslarımız benen tolısıp barmaqta. Sońǵı waqıtları Qurallı Kúshlerimizde bolıp atırǵan strukturalıq ózgerisler áskeriy potencialımızdı arttırıw menen birge, Armiya hám Xalıq birligin támiyinlew baǵdarında jańa dáwirdi baslap bermekte.
Ilajda usı jılı qabıllanǵan jas áskerlerdiń sapta júriw tayarlıǵı, qol urısı boyınsha ózlestirgen kónlikpeleriniń kórgizbeli shıǵıwları tamashalanıp, kórkem óner sheberleriniń atqarıwındaǵı koncert baǵdarlaması qoyıp berildi.
– Ana-Watanı ushın xızmet etiw hár bir er jigittiń parızı. Men, balam Kárimov Baxramnıń búgingi kúni erjetip, áskerler qatarında sapta júrgenin kórip oǵada quwanıp turıppan. Onıń búgingi kúngi ant beriw máresimin ótkerip jibermew ushın Tashkent qalasınan keshe kelgen edim. Balamdı kórip uzaq joldan sharshaǵanımnıń barlıǵı shıǵıp ketti,-deydi Sh.Zuxurova.
Ilaj sońında ata-analar balaları menen kórisip, komandirleri menen ushırasıp, I.Savickiy atındaǵı Qaraqalpaq mámleketlik kórkem óner muzeyine hám basqa da payızlı orınlarǵa sayaxat etti.
Á.Jiemuratov,
Qaraqalpaqstan xabar agentliginiń xabarshısı.
(M.Habibullaevtıń túsirgen súwretleri).