Úlkemizge báhár máwsiminiń kirip keliwi menen mart–aprelde abadanlastırıw hám kóklemzarlastırıw aylıǵı ótkerilip kelinbekte. Usı múnásibet penen 18-19 mart kúnleri bolıp ótken ulıwmaxalıqlıq qayırqomlıq shembilikke respublikamız xalqı belsendilik penen qatnastı.

Jasarıw hám jańalanıw áyyyamı bolǵan ulıwmaxalıqlıq Nawrız bayramın múnásip kútip alıw xalqımızdıń ázelden kiyatırǵan jaqsı úrp-ádetlerinen biri esaplanadı. Ózbekistan Respublikası Prezidentiniń usı jıl 23-fevral kúngi «2018-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında»ǵı qararın orınlaw maqsetinde barlıq qala hám rayonlarda, awıl hám mákan puqaralar jıyınlarında, miynet jámáátleri menen oqıw orınlarında qayırqomlıq shembiligi shólkemleskenlik jaǵdayında ótkerildi.

«Máhálle» qayırqomlıq jámiyetlik fondı Qaraqalpaqstan Respublikası bóliminen alınǵan maǵlıwmat boyınsha shembilikke jámi 1 million 400 mıńnan zıyat adam belsendilik penen qatnastı. Eki kún dawamında 2876 gektar maydan tazalanıp, 3952 tonna qurılıs jáne turmıs shıǵındıcı alıp taslandı. 1573 kilometr aralıqtaǵı jap-salma tazalandı. Respublikamız boyınsha 281 qoyımshılıq penen 42 zıyarat etiw ornında abadanlastırıw jumısları alıp barıldı. Qatnasıwshılar tárepinen 515980 sayamanlı, 345000 miyweli terek otırǵızıldı. Bul jumıslarǵa 980 dana texnika qatnastırıldı.

Shembilik dawamında bir qatar qayırqomlıq ilajları da ámelge asırıldı. Atap aytqanda, 1560 járdemge mútáj shańaraqtıń, sonıń ishinde 850 mayıp jáne kekselerdiń hal-jaǵdayınan xabar alınıp, qayırqomlıq járdemi kórsetildi. Sonday-aq, ilaj sheńberinde 1510 kem támiyinlengen shańaraqtıń turaq jayı menen úy átirapı tártipke keltirildi.

D.ABIBULLAEV,

Qaraqalpaqstan xabar agentliginiń xabarshıcı.