Qanlıkól rayonındaǵı “Agrotex Servis“ klaster JShJ da Ózbekstan fermer, diyqan xojalıqları hám qıytaq jer iyeleri Keӊesi baslıǵınıӊ birinshi orınbasarı K.Sabirov, Qaraqalpaqstan fermer, diyqan xojalıqları hám qıytaq jer iyeleri Keӊesiniń baslıǵı I.Yunusov, rayon hákimligi, fermer, diyqan xojalıqları hám qıytaq jer iyeleri Keӊesi tárepinen texnikalardıӊ báhárgi egis máwsimine tayarlıǵı kózden ótkerildi.
Prezidentimizdiӊ “Qaraqalpaqstan Respublikasın kompleksli sociallıq-ekonomikalıq rawajlandırıw hám xalıqtıń bǝntligin tǝmiyinlewdiń qosımsha ilajları haqqında”ǵı qararı tiykarında “Qanlıkól texnika-servis orayı” hám “Agro-Tex-Klaster” JShJ ǵa 15 dana New Holland 70-60 súrim traktorı, 15 dana aylanbalı zamanagóy plug, 3 dana universal seyalka, 1 dana diskalı (diskavoy vorona) agregat, 3 dana paxta teriw mashinası, 3 dana lazerli jer tegislewshi úskene hám 10 dana qatar arasın qayta islewshi traktorlar alıp kelingen.
Atap ótilgenindey, texnikalardı házirden baslap egis máwsimine tayarlaw, báhárgi egis mapazınıń ónimli hám nátiyjeli bolıwına tiykar jaratadı.
Qatnasıwshılar rayondaǵı «Arzımbetqum» APJ diyqan xojalıqları hám qıytaq jer iyeleri tárepinen jetistirilip atırǵan ónimlerdi de kórip, búgingi jumısları menen tanıstı.
Aymaqtaǵı S.Ótepbergenovtıń shaӊaraǵında jetistirilip atırǵan qulpınay sortların tárbiyalaw hám nál alıw jumısları kózden ótkerildi.
Jumısshı topar aǵzaları awıl xojalıǵı eginleriniӊ agrotexnikası boyınsha ózleriniӊ pikir-usınısların bildirip, wazıypalar belgilendi.
Qaraqalpaqstan xabar agentligi.