10-12-yanvar kúnleri Tuniste qılıshlasıwdıń sablya túri boyınsha Gran-pri jarısı bolıp ótedi.
Bul jarısqa dúnyanıń 37 mámleketinen 300 ge shamalas sportshılar qatnasadı. Áhmiyetli tárepi sonda, Gran-prige Ózbekstan saylandı komandası aǵzaları da qatnasadı. Ózbekstan qılıshlasıw federaciyasınıń málim etiwinshe, saylandı komandamız bul turnirge úlken quramda baradı. Atap aytqanda, jaslarımız búgin Kolumbiyada start alatuǵın U-20 kategoriyasındaǵı jáhán kuboginen soń Tuniske jetip barsa, eresekler komandası Tashkenttegi juwmaqlawshı tayarlıqtan keyin Afrikaǵa ushıp ketedi.
Federaciyanıń bergen maǵlıwmatlarǵa qaraǵanda, saylandı komanda quramında erler arasında Islambek Abdazov, Zuhriddin Qodirov, Musa Aymuratov, Alpamıs Oraqbaev hám Sardor Abdukarimbekovlar, qızlar arasında Zaynab Dayıbekova, Gúlistan Perdebaeva, Fernanda Еrrera, Nargiza Jaqsıbaeva, Ayakóz Jumamuratova hám Samira Shokirovalar qatnasadı.

Adilbay Orazov,
Qaraqalpaqstan xabar agentligi sholıwshısı.