Qazaqstan prezidenti Qasım-Jomart Toqaev 2024-jıl dawamında samolyotta derlik 159 mıń kilometr joldı basıp ótti. Bul Jer sharınıń onıń ekvatorı boylap tórt márte aylanıp shıǵıwǵa teń aralıq bolıp esaplanadı.

Sol sebepli Qazaqstan prezidenti samolyotta hám vertolyotta jámi 245 saat 18 minut waqıt ótkergen.
Bul sanlar Qazaqstan prezidenti baspasóz xızmeti tárepinen tayarlanǵan jıl juwmaqlarına baǵıshlanǵan tallawlarda kórsetilgen.
Atap ótilgenindey, Toqaev jıl dawamında 23 sırt el saparın ámelge asırǵan, 19 xalıqaralıq forum hám sammitte qatnasqan. Xalıqaralıq ilajlar sheńberinde 27 prezident penen, 84 mámleket, húkimet basshıları hám basqa joqarı mártebeli juwapkerler menen sóylesiwler ótkergen.
Qazaqstan 2024-jıl dawamında Shanxay birge islesiw shólkemi, Túrkiy mámleketler shólkemi, Aziyada birge islesiw hám isenim ilajları boyınsha keńes, Kollektiv qáwipsizlik shártnaması shólkemi, Azıq-awqat qáwipsizligi Islam shólkemi, Araldı qutqarıw xalıqaralıq qorı sıyaqlı strukturalarda basshılıq etkeni Astana sırtqı siyasatındaǵı jetiskenlikler sıpatında atap ótilgen.
Maǵlıwmat ornında, Qazaqstan prezidentiniń Jer sharın tórt márte aylanıwǵa teń saparlarına Ózbekstanǵa bolǵan saparıda kiredi. Aldın xabar bergenimizdey, 2024-jıl aprel ayında Qasım-Jomart Toqaev Xiywa qalasında Ózbekstan prezidenti Shavkat Mirziyoev penen ushırasqan edi.
Ózbekstan prezidenti baspasóz xızmeti de mámleketimiz basshısı Shavkat Mirziyoevtiń 2024-jıldaǵı sırtqı siyasiy ilajlarǵa , mámleketlik hám jámiyetlik turmısqa baylanıslı waqıyalarǵa bay bolǵan hár tárepleme jumısına baylanıslı sanlardı járiyalaǵanın esletip ótemiz,-dep málimleme beredi xabar.uz saytı.

Qaraqalpaqstan xabar agentligi