Paytaxtımız Nókis qalasında bolıp ótken bayram tamashalarınan reportaj
«Áziz Watanlaslar, hár kúnińiz Nawrız bolsın!» degen ideyanı ózinde jámlegen «Nawrız» ulıwmaxalıqlıq bayramı paytaxtımızda úsh orında – «Jaslar orayı», I.V.Savickiy atındaǵı Mámleketlik kórkem-óner muzeyi aldında hám «Istiqlol» balalar dem alıw orayında bolıp ótti. Bayram ilajları ótkeriletuǵın orınlarda barlıq sharayatlar jaratılǵan.
«Jaslar orayı» aldındaǵı maydanda Jas tamashagóy teatrı jámáátiniń, 22-sanlı Balalar kórkem óner muzıka mektebiniń, Nókis mádeniyat hám kórkem óner kolledjiniń oqıtıwshı hám oqıwshılarınıń atqarıwındaǵı koncertlik baǵdarlamaları jıynalǵanlar názerine usınıldı. Sonday-aq, bul jerde Milliy mádeniy oraylardıń, «Ózbekkoncert» mámleketlik mákemesiniń estrada qosıqshıları, Shomanay, Qońırat, Kegeyli, Beruniy, Taqıyatas rayonlarınıń kórkem óner jámáátleri xalıq xızmetinde boldı.
Bir topar zıyalılar menen elimizdiń kórnekli insanlarınan dúzilgen úgit-násiyat toparı da ótkerilgen mádeniy ilajlarda qatnastı.
Bayram seyillerinde xalqımızǵa inam etilgen koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.
Elimiz boylap bayram tamashaları dawam etpekte.
* * *
«Áziz watanlaslar, hár kúnińiz Nawrız bolsın!» súreni astında I.V. Savickiy atındaǵı qaraqalpaq mámleketlik kórkem-óner muzeyi aldındaǵı maydanda bayramǵa baǵıshlanǵan ulıwmaxalıqlıq seyil bolıp ótti.
Maydannıń bir tárepinde Qaraqalpaqstan Respublikası Bilimlendiriw ministrligi hám respublikamızdaǵı milliy mádeniy oraylar tárepinen respublikamızda jasap atırǵan basqa milletlerdiń jáne milliy kiyimlerimizdiń, kesteshilik úlgileri, úy-ruwzıgershilik buyımları, milliy taǵamlarınıń kórgizbesi shólkemlestirilgen bolsa, jáne bir tárepte elimizge belgili usta xudojnikler jas qálemkeshlerge master-klass ótkerdi. Sol jerde háwesker xudojniklerdiń dóretpeleri kórgizbege qoyılıp, olar kórkem-óner ıqlasbentlerinde úlken qızıǵıwshılıq oyattı. Maydan ortasındaǵı fontan átirapına qara úyler, ıspalar jaylastırılıp, xalıqtıń dem alıwı ushın sharayatlar jaratıldı.
Muzey aldında saat 10:30 da teatrlastırılǵan koncert-baǵdarlaması baslandı. Onda Berdaq atındaǵı Qaraqalpaq mámleketlik akademiyalıq muzıkalı teatrınıń, 12-sanlı Balalar muzıka hám kórkem-óner mektebiniń, «Ámiw tolqını», «Húrliman», «Ayqulash juldızları» ansamblleriniń, milliy estrada qosıqshılarınıń shıǵıwları seyilge jáne de joqarı keypiyat baǵıshladı. Bıyıl da Nawrız bayramı jańa kóriniste, ózgeshe keypiyatta ótkerildi.
Prezidentimiz Sh.Mirziyoevtiń baslaması menen bayramlar xalıq seyili túrinde ótkerile baslaǵannan berli jıldan-jılǵa milliy bayramlarımızdıń abıroyı artıp, xalqımızdıń da ruwxıy dem alıwǵa, kórkem-ónerge degen ıqlası arta tústi. Sonıń menen birge xalqımızdıń eski, tariyxıy úrp-ádet, dástúrlerin tiklewge hám olardı jas áwladqa jetkeriw arqalı ómirin uzaytıwǵa erisilmekte. Respublikamızdaǵı basqa millet wákilleriniń turmısına, úrp-ádetleriniń ózgesheligine húrmet hám itibar arttı.
* * *
Xalıq seyili tárizindegi «Nawrız» bayramı tamashaları «Istiqlol» balalar dem alıw orayında da bolıp ótti.
Bayram tamashası baǵdarlamasınan «Qız-jigitler seyili», «Nawrız seyili», «Nawrız toyın toylayıq» sıyaqlı kompoziciyalar, sonday-aq, qaraqalpaq xalıq kosıqları menen birge, qazaq, orıs, koreys, túrkmen xalıqlarınıń yoshlı ayaq oyın hám qosıqları, jáne de «Báhár», «Sálem Nawrız», «Qaynar súmelek», «Báhárim keldi», «Báhár, báhár» qosıqları orın alǵan.
Orayǵa kiriwden-aq, qaraqalpaq milliy kiyimindegi qız-jigitleri saz-sáwbet penen kútip aladı. Olar tárepinen tayarlanǵan milliy taǵamlarǵa tolı dásturxan, ásbap-úskeneler, qol óneri úlgileri kórgen kózdi quwandıradı.
Respublikamızdaǵı 4 akademiyalıq licey hám 21 kásip óner kolledjleri, rayonlardaǵı ónermentler bayramnıń kóterińki ruwxta ótiwine belsene qatnaspaqta.
Búgingi ilajǵa 74 milliy buyımlar, 45 túrli milliy taǵam, 20 dana qol óneri úlgileri menen qatnasıp atırmız, – deydi Nókis sanaat hám xızmet kórsetiw kásip-óner kolledji oqıtıwshısı B.Ibrayimova. Sonday-aq, qaraqalpaq xalqınıń milliy úrp-ádet hám dástúrlerin sáwlelendiriwshi kórinisler «Qız-jigitler aytısı», xalıq qosıqları atqarılmaqta.
Usı jerdiń ózinde Qaraqalpaqstan Respublikası dene tárbiya hám sport boyınsha mámleketlik komiteti tárepinen sporttıń kurash, belbewli gúres, arqan tartıs, tas kóteriw túrleri boyınsha jarıslar ótkerildi.
Arqan tartısı boyınsha jámi 8 komanda qatnastı. Eń áhmiyetlisi onda kurash hám belbewli gúres boyınsha palwan qızlarımız da belsendilik kórsetip, gilemge túspekte.
Paytaxtımızda bayram tamashaları ele dawam etpekte.
Á.Jiemuratov,
M.Pirnazarova,
T.Seytnazarova,
Qaraqalpaqstan xabar agentliginiń xabarshıları.