O‘zbekiston Yozuvchilar uyushmasi Vatanimiz mustaqilligining 32 yilligiga bag‘ishlab ona diyorimizda amalga oshirilayotgan keng ko‘lamli islohotlar, jonajon O‘zbekistonimizning buyuk kelajagi yo‘lidagi ulug‘vor yangilanishlar, fidoyi zamondoshlarimizning yorqin siymolari aks ettirilgan, yuksak mahorat bilan yozilgan badiiy-publitsistik maqolalar, ocherklar, nasriy va she’riy yo‘nalishdagi eng sara asarlarning an’anaviy “Vatan uchun yashaylik!” Respublika tanlovini e’lon qiladi.

Tanlovga 2022 yilning 1 avgustidan 2023 yilning 15 avgustiga qadar respublikamizdagi vaqtli matbuot va adabiy nashrlarda e’lon qilingan yoki kitob holida chop etilgan badiiy-publitsistik maqolalar, ocherklar, nasriy va she’riy yo‘nalishdagi asarlar taqdim etilishi mumkin. Ularda zamondoshlarimizning fidokorona mehnatlari, zahmatkash xalqimiz amalga oshirayotgan bunyodkorlik ishlari, ijtimoiy hayot, ma’naviy-ma’rifiy sohalardagi olamshumul o‘zgarishlar, buyuk ajdodlarimizning boy ilmiy va ma’naviy merosini o‘rganish va keng targ‘ib qilish, xalqimizning tinch va osoyishta hayotini ishonchli ta’minlash maqsadida Qurolli Kuchlar tizimida olib borilayotgan keng miqyosdagi islohotlar, kitob mutolaasi va kitobxonlik madaniyati targ‘iboti, yurtimiz obodligi, milliy qadriyatlarimiz va yosh avlod kamoli, milliy g‘urur va iftixor, Vatan tuyg‘usi, Istiqlol g‘oyalari hayotiy misollar, teran fikr-mulohazalar bilan tarannum etilishi lozim.

Tanlov ishtirokchilari (muallif arizasi va uning professional faoliyati to‘g‘risida qisqacha ma’lumot, pasport nusxasi, manzil va bog‘lanish telefon raqamlarini ilova qilgan holda) o‘z ijodiy ishlarini “Vatan uchun yashaylik” ko‘rik-tanloviga deb ko‘rsatgan holda Toshkent shahri, Chilonzor tumani, Bunyodkor ko‘chasi, Adiblar xiyoboni, O‘zbekiston Yozuvchilar uyushmasi binosi manziliga yuborishlari mumkin.

Yuborilgan ijodiy ishlar 2023 yilning 18 avgustiga qadar qabul qilinadi hamda tanlov hay’ati tomonidan ko‘rib chiqiladi.

Tanlov g‘oliblari O‘zbekiston Respublikasi Mustaqilligining 32 yilligi bayrami arafasida diplom hamda pul mukofotlari bilan taqdirlanadi.

Qo‘shimcha ma’lumot olish uchun telefon: (71) 231-83-67.

TANLOVGA MARHAMAT, AZIZ IJODKORLAR