Xabar berganimizdek, joriy yilning 30 aprel – 14 may kunlari poytaxtimizdagi “Humo” arena sport majmuasida boks bo‘yicha kattalar o‘rtasidagi Jahon chempionati bahslari bo‘lib o‘tadi.

O‘zbekistonda ilk bor tashkil etilayotgan dunyo birinchiligi g‘olib va sovrindorlari qancha miqdordagi mukofotlar bilan taqdirlanishi rasman tasdiqlandi.

Xalqaro boks assotsiatsiyasi xabariga ko‘ra, chempionatning umumiy mukofot jamg‘armasi 5,2 million AQSH dollari etib belgilangan. Musobaqada 1-o‘rinni egallagan bokschilar 200 ming, 2-o‘rin sohiblari 100 ming, 3-o‘rindan joy olganlar 50 ming AQSH dollari bilan taqdirlanadi.

Jahon chempionati dasturiga ko‘ra, janglar 13 ta vazn toifasida tashkil etiladi.

Mazkur nufuzli musobaqada vatanimiz sharafini himoya qiladigan bokschilarimiz ayni kunlarda Toshkent viloyatining “Yangiobod” o‘quv bazasida tayyorgarlikning so‘nggi mashg‘ulotlarini o‘tkazmoqda.

T.Ro‘ziyev, O‘zA