Surxondaryo viloyatida ham Yangi yil bayramini yuqori saviyada o‘tkazish uchun puxta hozirlik ko‘rilmoqda.
Mahalla, ko‘cha va xiyobonlar, korxona, tashkilot va muassasalar bayramona bezatilib, rang-barang tungi chiroqlar o‘rnatilayotir. Bayramoldi yarmarkalari tashkil etilib, oziq-ovqat mahsulotlari arzon narxlarda aholiga taklif qilinmoqda. Joylarda bayram tadbirlarining tinch-osoyishta va ko‘tarinki ruhda o‘tishi uchun yong‘in, yo‘l-transport va boshqa xavfsizlik choralari belgilab olingan.
Termiz shahridagi Bolajon bog‘i yonida o‘rnatilgan va bayramona bezatilgan 33 metrli archa, ayniqsa, bolalar va yoshlarga o‘zgacha zavq ulashmoqda.
– O‘tgan Yangi yil bayrami arafasida ham Termizga kelgan edim, – deydi denovlik Sh.Mannopov. – O‘shanda bu maydonga o‘rnatilgan archaning bo‘yini 20 metrdan baland deyishgan edi. Bu yil esa 30 metrdan ortiq. Qoyil-e, bir yilda o‘n metrdan ko‘proq “o‘sibdi”! Ulkan archa Yangi yil bayramiga o‘zgacha fayz berar ekan.
Xolmo‘min Mamatrayimov, Farhod Abdurasulov (surat), O‘zA